کوہلی، روہت جنوبی افریقہ کے خلاف ٹی20 سے باہر ہو سکتے ہیں

کولکاتہ، مئی۔ آئی پی ایل 2022 کے فوراًبعد جنوبی افریقہ 9 جون سے 19 جون کے درمیان پانچ میچوں کی ٹی20 سیریز کے لیے ہندوستان کا دورہ کرے گا۔ساتھ ہی ہندوستان بھی16 جون کو انگلینڈ کے دورے پر روانہ ہوگا۔ ایسے میں یہ ممکن ہے کہ چیتن شرما کی سلیکشن کمیٹی دونوں سیریز کے لیے دو مختلف ٹیموں کا انتخاب کرے۔کرک بز کے مطابق وراٹ کوہلی، جسپریت بمراہ، رشبھ پنت، کے ایل راہل، محمد شامی، روی چندرن اشون، رویندرا جڈیجہ اور چیتشور پجارا کوانگلینڈ کے دورے میں شامل کیاجائے گا جبکہ انہیں جنوبی افریقہ کے خلاف آرام دیا جائے گا۔جنوبی افریقہ کے خلاف ہونے والے پانچ ٹی ٹوئنٹی میچوں میں آئی پی ایل میں اچھی کارکردگی دکھانے والے کھلاڑیوں کو جگہ دی جا سکتی ہے۔ شکھر دھون کی کپتانی میں تلک ورما، عمران ملک اور ارشدیپ سنگھ ٹیم میں جگہ بنا سکتے ہیں۔ سلیکٹرز کی میٹنگ سے قبل آئی پی ایل میں زخمی ہونے والے سوریہ کمار یادو کی صحت کا بھی جائزہ لیا جائے گا۔یہ قیاس آرائیاں بھی ہیں کہ جنوبی افریقہ کے خلاف ٹی ٹوئنٹی کھیلنے والی ٹیم 26 اور 28 جون کو ہونے والے ٹی ٹوئنٹی مقابلوں کے لیے آئرلینڈ کا دورہ کرے گی جب کہ سینئر کھلاڑی انگلینڈ کے دورے میں مصروف ہوں گے۔