ترقی یافتہ ہندوستان کے ہدف کو سامنے رکھ کر طویل مدتی سرمایہ کاری کے فیصلے کرے صنعتکار طبقہ: وزیر اعظم مودی
نئی دہلی، وزیر اعظم نریندر مودی نے ملک کے صنعتکاروں سے ترقی یافتہ اور خود کفیل ہندوستان کے ہدف کے ساتھ آگے بڑھنے کی اپیل کرتے ہوئے کہا ہے کہ اب یہ طے کرنے کا وقت آگیا ہے کہ ہندوستانی صنعتیں آئندہ 20 برسوں میں کیا حاصل کرسکتی ہیں۔ اس کے لیے صنعتوں کو طویل مدتی سرمایہ کاری کے فیصلوں میں ’انڈیا فرسٹ‘ یعنی ہندوستان کو اولین ترجیح دینے کے نظریے کو بنیاد بنانا ہوگا۔ انہوں نے کہا کہ ہندوستان کے خود کفیل بننے سے کاروبار کے نئے مواقع پیدا ہوں گے۔وزیر اعظم نے جمعرات کو نئی دہلی کے بھارت منڈپم میں فیڈریشن آف انڈین چیمبرز آف کامرس اینڈ انڈسٹری (فکی) کی سالانہ عام میٹنگ اور سالانہ کانفرنس کا افتتاح کیا۔ اس موقع پر انہوں نے اپنی حکومت کو صنعت دوست اور صنعتکاروں کی ’دوست حکومت‘ قرار دیتے ہوئے کہا کہ صنعتکار اصلاحات کے حوالے سے بلا جھجک اپنی رائے پیش کریں۔وزیر اعظم نے کہا کہ ماضی کی حکومتوں کے ساتھ صنعتکاروں کے تجربات ایسے رہے ہیں کہ وہ اپنی بات کھل کر کہنے میں ہچکچاتے ہیں۔ انہوں نے کہا، ’’پرانی حکومتوں کے ساتھ صنعتوں کا تجربہ اتنا تلخ رہا ہے کہ اس کا خمیازہ مجھے بھگتنا پڑ رہا ہے۔ یہ پرانی حکومت نہیں، بلکہ دوست حکومت ہے۔ یہ دوستی نبھانا جانتی ہے اور آپ میرے سچے دوست ہیں۔ اس لیے بلا کسی جھجک مجھے کھل کر لکھ کر بھیجیے کہ اب بھی کون سی اصلاحات ضروری ہیں۔‘‘وزیر اعظم نے صنعتکاروں سے یہ بھی غور کرنے کی اپیل کی کہ ایسے کون سے صنعتی اجزا اور مصنوعات ہیں، جن کی تیاری اور پیداوار ہندوستان میں ہی ممکن ہے۔ اس سلسلے میں انہوں نے فارما صنعت کی مثال دیتے ہوئے کہا کہ ہندوستان کو دنیا کی ’فارمیسی آف دی ورلڈ‘ کہا جاتا ہے، اس کے باوجود ملک ہر سال فعال دوا ساز اجزا (اے پی آئی)، بلک ڈرگس اور ڈرگ انٹرمیڈیٹس کی درآمد پر اربوں ڈالر خرچ کرتا ہے۔انہوں نے کہا کہ ایسی سیکڑوں مصنوعات اور شعبے ہیں، جن کے لیے آج بھی ہندوستان درآمدات پر منحصر ہے۔ فارما صنعت کو یہ سمجھنا ہوگا کہ کن اجزا کی تیاری ملک میں ممکن ہے اور کن شعبوں میں نئی ٹیکنالوجی اور بڑے پیداواری پلانٹس میں سرمایہ کاری کرکے دوسرے ممالک کے مقابلے میں مسابقتی صلاحیت حاصل کی جاسکتی ہے۔
مودی نے صنعتکاروں کو خود احتسابی کا مشورہ دیتے ہوئے کہا کہ انہیں اپنی صلاحیتوں کو پہچاننا، خامیوں سے سبق سیکھنا اور مسلسل بہتری کی کوشش کرنی چاہیے۔ عالمی صارفین کی ضروریات کو سمجھنے، بین الاقوامی معیار کے مطابق مصنوعات تیار کرنے اور مضبوط تقسیم کاری کا نیٹ ورک قائم کرنے میں سرمایہ کاری کی ضرورت ہے۔انہوں نے کہا کہ 140 کروڑ ہندوستانیوں کو ایسا بازار نہ سمجھا جائے جہاں کچھ بھی فروخت کیا جاسکتا ہے۔ آج بھی کئی مرتبہ فروخت کنندگان صارفین کو یہ کہہ کر اپنی مصنوعات کی اہمیت بتاتے ہیں کہ یہ ’ایکسپورٹ کوالٹی‘ کی ہے۔ صنعتکاروں کو اس ذہنیت کو تبدیل کرنا ہوگا اور ملک میں ہی عالمی معیار کی مصنوعات تیار کرنی ہوں گی۔وزیر اعظم نے صنعتوں سے سرکاری ٹیکس رعایتوں اور دیگر سہولتوں کا فائدہ اپنے ملازمین تک پہنچانے کی اپیل بھی کی۔ انہوں نے کہا کہ ان کی حکومت نے کارپوریٹ ٹیکس کی بنیادی شرح 2014 میں 30 فیصد سے کم کرکے 22 فیصد کردی ہے، جبکہ اب 12 لاکھ روپے تک کی سالانہ آمدنی پر کوئی انکم ٹیکس نہیں ہے۔انہوں نے صنعتکاروں سے سوال کیا کہ کیا ٹیکس میں دی گئی رعایتوں کے بعد انہوں نے اپنے ملازمین کی تنخواہوں میں اضافہ کیا یا مزید افراد کو ملازمتیں فراہم کیں؟ مودی نے کہا کہ حکومت نے انکم ٹیکس ریٹرن اور ریفنڈ کے عمل کو بھی آسان بنایا ہے۔ پہلے ریفنڈ ملنے میں آٹھ ماہ تک لگ جاتے تھے، لیکن اب ایک ہفتے کے اندر رقم واپس مل جاتی ہے۔وزیر اعظم نے ملک کی اقتصادی تاریخ کا ذکر کرتے ہوئے کہا کہ ہندوستان نے لائسنس کوٹہ راج، قومیانے کے ناکام تجربے اور پھر 21ویں صدی میں ایسے دور کا سامنا کیا، جب ہندوستانی معیشت کو دنیا کی پانچ کمزور ترین معیشتوں میں شمار کیا جانے لگا تھا۔ تاہم گزشتہ 12 برسوں میں ملک کے عوام نے اس صورت حال کو تبدیل کرنے کے لیے سخت محنت کی ہے۔ نوجوانوں، کسانوں، مزدوروں اور صنعتکاروں سمیت ہر طبقے نے اس تبدیلی میں اپنا کردار ادا کیا ہے۔انہوں نے صنعتکاروں پر زور دیا کہ وہ زراعت کے شعبے میں بھی سرمایہ کاری بڑھائیں۔ اس کے ساتھ مخصوص بیرونی منڈیوں کو سامنے رکھتے ہوئے قابلِ اعتماد خریداری اور فراہمی کا نظام تیار کیا جائے اور ایسی مصنوعات بنائی جائیں جن کی ان بازاروں میں حقیقی مانگ موجود ہو، تاکہ ہندوستانی مصنوعات عالمی سطح پر ملک کی شناخت بن سکیں۔فکی کے 100 سال مکمل ہونے پر مبارکباد پیش کرتے ہوئے وزیر اعظم نے کہا کہ کسی ادارے کا ایک صدی تک مسلسل سرگرم رہنا، بدلتے وقت کے ساتھ خود کو ڈھالنا اور ملک کے اقتصادی سفر میں اپنا کردار ادا کرتے رہنا بڑی کامیابی ہے۔ہندوستانی معیشت کی ترقی کا ذکر کرتے ہوئے مودی نے کہا کہ گزشتہ 12 برسوں میں ملک نے اجتماعی کوششوں سے بہت کچھ حاصل کیا ہے۔ آج ہندوستان میں ترقی کی رفتار تیز ہے اور غربت سے باہر نکلنے کی رفتار بھی قابلِ ذکر ہے۔ انہوں نے ورلڈ بینک کی تازہ رپورٹ کا حوالہ دیتے ہوئے کہا کہ گزشتہ 12 سے 13 برسوں میں ہندوستان کے 50 کروڑ افراد غربت سے باہر نکلنے میں کامیاب ہوئے ہیں۔وزیر اعظم نے کہا کہ فکی بھی اس تبدیلی کی گواہ ہے۔ یہ اس بات کا ثبوت ہے کہ ہندوستان آج جس سمت میں آگے بڑھ رہا ہے، وہ درست ہے اور اس میں ملک کی کامیابی کے امکانات روشن ہیں۔




