بالاصاحب ٹھاکرے کی تصویر پھاڑنے کے تنازع پر شائنا این سی نے معافی مانگی

ممبئی ، ۔ کانگریس رہنما سونیا گاندھی کی کتاب کے خلاف بدھ کو ممبئی میں شیوسینا شندے گروپ کی پریس کانفرنس میں بالاصاحب ٹھاکرے کی تصویر غیر ارادی طور پر پھٹنے کے بعد ترجمان شائنا این سی اور پارٹی کو تنقید کا سامنا ہے۔ شائنا نے آن لائن معافی مانگی، تاہم کہا کہ بالاصاحب سے محبت اور وفاداری ثابت کرنے کے لیے انہیں کسی سرٹیفکیٹ کی ضرورت نہیں۔ واقعے کے بعد پارٹی رہنما ایکناتھ شندے نے انہیں ملاقات کے لیے بلایا تھا۔ دوسری جانب ٹھاکرے گروپ نے ممبئی میں ان کے خلاف احتجاج کی اپیل کی ہے۔
شائنا این سی نے لکھا کہ بعض رشتے ہمیشہ دل میں رہتے ہیں اور بالاصاحب ان کے لیے والد اور دیوتا کی مانند تھے۔ بچپن میں ان سے ملاقات ہوئی۔ وہ ان کے والد کے قریبی دوست تھے اور خاندان سے گہرا تعلق رکھتے تھے۔ برسوں ان کی رفاقت اور دعائیں ملیں اور وہ شائنا کی شادی میں بھی شریک ہوئے۔ شائنا کے مطابق بالاصاحب مہاراشٹر ہی نہیں پورے ملک کے منفرد رہنما، محب وطن، ہندو شناخت پر فخر کرنے والے اور سواتنتریہ ویر ساورکر کے عقیدت مند تھے۔ انہوں نے ہندوتوا کے نظریات پر سمجھوتہ نہیں کیا اور کانگریس کی نظریاتی مخالفت کی۔ ان کے واضح اور بے باک خیالات شائنا کے لیے تحریک رہے ہیں۔انہوں نے کہا کہ پریس کانفرنس میں بالاصاحب کے نظریات کا حوالہ دیا مگر ان کے عمل اور بیان کو جان بوجھ کر توڑا مروڑا گیا۔ ان کا مقصد توہین نہیں تھا بلکہ ان کے نظریات سے تحریک لیتی ہیں۔ ان کے مطابق کروڑوں افراد کے لیے بالاصاحب محض رہنما نہیں بلکہ قابل پرستش شخصیت تھے۔ اگر ان کے عمل سے حقیقی شیوسینکوں یا حامیوں کے جذبات غیر ارادی طور پر مجروح ہوئے تو وہ دل سے معافی مانگتی ہیں۔ انہوں نے بعض افراد پر واقعے کو سیاسی رنگ دینے کا الزام لگایا۔ ان کا کہنا تھا کہ اقتدار اور ذاتی مفاد کے لیے بالاصاحب کے نظریات سے سمجھوتہ کرنے والے انہیں سبق نہ دیں۔ یہ رشتے سیاست سے بالاتر ہیں۔ بالاصاحب کی دعائیں اور یادیں ان کی اصل طاقت ہیں، جنہیں کوئی چھین نہیں سکتا۔

Related Articles