ذہنی صحت کے عالمی دن کے موقع پر بیداری ریلی

بھاگلپور، ۔ ذہنی صحت کے عالمی دن کے موقع پر ہفتہ کے روز بھاگلپور صدر اسپتال سے بیداری ریلی نکالی گئی۔ اس کا مقصد عام لوگوں کو ذہنی صحت کے تئیں بیدار کرنا اور ڈپریشن، ذہنی دباؤ اور بے چینی جیسی پریشانیوں سے متعلق معاشرے میں پھیلی غلط فہمیوں کو دور کرنا تھا۔صدر اسپتال کے ڈپٹی سپرنٹنڈنٹ ڈاکٹر آنند کھاکھا نے ہری جھنڈی دکھاکر ریلی کو روانہ کیا۔ ریلی اسپتال احاطے سے نکل کر کچہری چوک، اسٹیشن روڈ، خلیفہ باغ چوک اور سوجا گنج بازار سمیت شہر کے مختلف اہم راستوں سے گزرتے ہوئے واپس صدر اسپتال پہنچ کر اختتام پذیر ہوئی۔ اس دوران محکمہ صحت کے اہلکار ہاتھوں میں بیداری سے متعلق نعروں والی تختیاں لیے لوگوں کو ذہنی صحت کی اہمیت سے آگاہ کررہے تھے۔
ریلی کے اختتام پر سول سرجن نے کہا کہ موجودہ دور میں اچھی نیند اور متوازن روزمرہ معمولات ذہنی اور جسمانی صحت کے لیے بے حد ضروری ہیں۔ طرز زندگی کو بہتر بناکر ذہنی دباؤ اور ڈپریشن جیسی پریشانیوں سے بڑی حد تک بچا جاسکتا ہے۔ڈاکٹر پنکج منسوی نے کہا کہ تیز رفتار زندگی میں ڈپریشن، شدید بے چینی اور گھبراہٹ جیسی علامات کو نظرانداز نہیں کرنا چاہیے۔ ایسی علامات ظاہر ہونے پر بلا جھجھک قریبی صحت مرکز یا ضلع اسپتال کے شعبۂ ذہنی صحت میں ڈاکٹروں سے رجوع کرنا چاہیے۔ انہوں نے بتایا کہ حکومت کی جانب سے مفت ٹیلی مانس ہیلپ لائن 14416 بھی چلائی جارہی ہے۔
بیداری مہم کے تحت صدر اسپتال کے اے این ایم اسکول کی طالبات نے اسپتال احاطے میں ایک نکڑ ناٹک بھی پیش کیا۔ اس کے ذریعے یہ پیغام دیا گیا کہ ذہنی بیماری میں مبتلا افراد کو طعنے دینے کے بجائے طبی اور نفسیاتی مشورے کی ضرورت ہوتی ہے۔پروگرام کے دوران لوگوں کو بتایا گیا کہ ذہنی بیماری پاگل پن نہیں، بلکہ ایک عام طبی مسئلہ ہے، جس کا مناسب علاج ممکن ہے۔ اس موقع پر اسپتال کے انچارج ڈاکٹر، کئی طبی افسران، صحت کارکنان اور بڑی تعداد میں مقامی شہری موجود تھے۔