بھاؤ نگر-تلجا ہائی وے پر خوفناک سڑک حادثہ، بولیرو سوار 6 افراد ہلاک

بھاؤ نگر، گجرات کے بھاؤ نگر-تلجا-سومناتھ ہائی وے پر منگل کی صبح ایک بھیانک سڑک حادثے میں 6 افراد کی موت ہوگئی۔ ابتدائی اطلاعات کے مطابق ٹراپج گاؤں کے قریب سڑک کے کنارے کھڑے ایک ٹریلر میں تیز رفتار بولیرو پیچھے سے جا گھسی۔ حادثے کی تصاویر سی سی ٹی وی کیمرے میں بھی قید ہوئی ہیں۔
بتایا گیا ہے کہ بولیرو میں سوار افراد صبح شپ بریکنگ یارڈ میں کام کرنے کے لیے جا رہے تھے۔ اسی دوران تیز رفتار بولیرو سڑک کنارے کھڑے ٹریلر سے پیچھے کی جانب سے ٹکرا گئی۔ ٹکر اتنی شدید تھی کہ بولیرو بری طرح تباہ ہوگئی اور اس میں سوار 6 افراد کی موقع پر ہی موت ہوگئی۔حادثے میں ہلاک ہونے والوں کی شناخت وجے بھائی، سادھو بھائی، جگیش بھائی، بھارگو بھائی، ہیرن بھائی اور یوگیش بھائی کے طور پر ہوئی ہے۔ حادثے میں زخمی جیش بھائی کو تشویشناک حالت میں پہلے بھاؤ نگر کے سول اسپتال لے جایا گیا، جہاں سے بعد میں بہتر علاج کے لیے شہر کے ایک نجی اسپتال منتقل کردیا گیا۔
اطلاعات کے مطابق تلجا تحصیل کے ٹراپج گاؤں کے قریب ٹریلر سڑک کے کنارے کھڑا تھا۔ ٹریلر کا ڈرائیور چائے پینے کے لیے گاڑی سے نیچے اترا ہوا تھا۔ اسی دوران پیچھے سے آنے والی تیز رفتار بولیرو ٹریلر سے جا ٹکرائی۔ تصادم کے نتیجے میں بولیرو کا اگلا حصہ مکمل طور پر تباہ ہوگیا۔حادثے کی اطلاع ملتے ہی مقامی پولیس موقع پر پہنچ گئی۔ پولیس نے تمام متوفیوں کی لاشیں پوسٹ مارٹم کے لیے اسپتال بھیج دی ہیں اور حادثے کی وجوہات کی تحقیقات شروع کردی ہیں۔ پولیس سی سی ٹی وی فوٹیج کی بنیاد پر مزید کارروائی کر رہی ہے۔