نوئیڈا بس میں لگی آگ ، نو مسافروں کی موت،کئی زخمی

لکھنؤ، اتر پردیش کے وزیر اعلیٰ یوگی آدتیہ ناتھ نے گریٹر نوئیڈا کے یمنا ایکسپریس وے پر سلیپر بس میں آگ لگنے کے واقعے کا نوٹس لیتے ہوئے متوفیوں کے اہل خانہ کو دو دو لاکھ روپے اور زخمیوں کو 50-50 ہزار روپے کی مالی امداد دینے کا اعلان کیا ہے۔ وزیر اعلیٰ نے حادثے پر افسوس کا اظہار کرتے ہوئے حکام کو زخمیوں کے مناسب علاج اور انہیں ہر ممکن طبی سہولت فراہم کرنے کی ہدایت دی ہے۔ انہوں نے متوفیوں کے اہل خانہ سے بات کرکے امداد کی یقین دہانی کرائی اور زخمیوں کی جلد صحت یابی کی دعا کی۔گریٹر نوئیڈا میں بدھ کی دیر رات جیور علاقے میں دَیانت پور گاؤں کے قریب دہلی سے مہوبا جارہی سلیپر بس میں اچانک آگ لگ گئی۔ آگ اتنی تیزی سے پھیلی کہ کچھ مسافر بس کے اندر پھنس گئے۔ پولیس اور بچاؤ ٹیم نے تقریباً 30 مسافروں کو بحفاظت باہر نکال لیا۔ حادثے میں نو مسافروں کی موت ہوگئی۔ متوفیوں میں ایک خاتون سمیت دیگر مسافر شامل ہیں۔ زخمیوں کو کیلاش اسپتال میں داخل کرایا گیا ہے۔
قابل ذکر ہے کہ راج کلپنا ٹریولس کی بتائی جانے والی بس کا نمبر بی آر 32 پی اے 8647 ہے۔ بس میں تقریباً 35 مسافر سوار تھے۔ رات تقریباً 12 بجے آگ لگتے ہی بس کے اندر دھواں بھر گیا اور اونچے شعلے اٹھنے لگے۔ ڈرائیور نے بس کو ایکسپریس وے کے کنارے روک دیا۔ اس کے بعد کئی مسافروں نے کھڑکیوں اور ہنگامی راستے سے باہر نکل کر جان بچائی، جبکہ کچھ مسافر آگ کی زد میں آگئے۔

اطلاع ملتے ہی پولیس، فائر بریگیڈ اور یمنا ایکسپریس وے کی نجی سکیورٹی ٹیم موقع پر پہنچ گئی۔ راحت اور بچاؤ ٹیم نے آگ پر قابو پانے کے بعد بس کی تلاشی لی اور اندر پھنسے مسافروں کو باہر نکالا۔ زخمیوں کو فوری طور پر اسپتال بھیجا گیا۔

حادثے کے باعث جیور ٹول اور پھلیدا کٹ کے قریب نصف گھنٹے سے زائد وقت تک ٹریفک روک دیا گیا۔ راحت اور بچاؤ کا کام مکمل ہونے کے بعد ایکسپریس وے پر ٹریفک بحال کردیا گیا۔

بس میں آگ لگنے کی وجوہات کی تحقیقات کی جارہی ہیں۔ پولیس اور انتظامیہ یہ معلوم کرنے میں مصروف ہے کہ آگ بس کے کس حصے سے شروع ہوئی اور اتنی تیزی سے کیسے پھیلی۔