ہریانہ میں سڑک حادثے میں اتر پردیش کے 6عقیدت مند جاں بحق، 14 زخمی، وزیر اعلیٰ یوگی نے اظہارِ افسوس کیا
مین پوری،۔ اتر پردیش کے مین پوری سے کھاٹو شیام اور ورنداون کے درشن کے لیے جانے والے عقیدت مندوں سے بھری میکس پک اَپ گاڑی ہریانہ کے پلول میں حادثے کا شکار ہوگئی۔ اس حادثے میں گاڑی میں سوار 6 عقیدت مند موقع پر ہی جاں بحق ہوگئے، جبکہ 14 افراد زخمی ہوئے ہیں۔
وزیر اعلیٰ یوگی آدتیہ ناتھ نے حادثے پر گہرے رنج و غم کا اظہار کیا اور زخمیوں کے مناسب علاج کے سلسلے میں ہریانہ حکومت سے بات کی۔ انہوں نے افسران کو ہلاک ہونے والے افراد کی لاشیں ان کے اہل خانہ تک پہنچانے کے بھی ہدایات دی ہیں۔
مین پوری کے کشنی علاقے سے زائرین کا ایک گروپ میکس پک اَپ گاڑی میں سوار ہوکر مذہبی سفر پر روانہ ہوا تھا۔ پیر کی شام راجستھان کے کھاٹو شیام اور سالاسر بالاجی مندر میں درشن کرنے کے بعد تمام افراد ورنداون کے لیے روانہ ہوئے تھے۔ اسی دوران منگل کی صبح پلول میں کے ایم پی ایکسپریس وے پر ان کی گاڑی سڑک کے کنارے کھڑے ایک ٹرک سے ٹکرا گئی۔
حادثے میں مین پوری کے وجے سنگھ، راج کمار، ریشما دیوی، کملا دیوی، سدھا اور مہیش کی موت ہوگئی۔ وہیں سونیل، شویتا یادو، بیرش، اومید، ونود کمار، سرلا، روبی، رام سیوک، روی، وانی، وینو، تنو، ریکھا اور گورا دیوی سمیت 14 افراد زخمی ہوئے ہیں۔
پولیس کے مطابق زخمیوں کو پلول کے اسپتال میں داخل کرایا گیا ہے۔ متوفین کی لاشیں ضلع اسپتال کی مردہ خانہ میں رکھوا دی گئی ہیں اور پولیس نے معاملے کی تحقیقات شروع کردی ہیں۔
