کیا بگ باس کے میزبان سلمان کی جگہ روہت شیٹی ہوں گے ؟

ممبئی،اگست۔بھارت کے معروف رئیلیٹی شو بگ باس 16 کی میزبانی کے حوالے سے خبریں زیر گردش تھیں کہ انتظامیہ نے سلمان خان کے متبادل کے طور پر روہت شیٹی سے رابطہ کیا ہے۔قیاس آرائیاں کی جارہی تھیں کہ انتظامیہ بگ باس 16 کی میزبانی کے فرائض روہت شیٹی کو دینے کے حوالے سوچ بچار کررہی ہے۔میڈیا کی رپورٹس میں یہ بھی کہا گیا تھا کہ بھاری بھرکم فیس مانگنے پر انتظامیہ نے شو کی میزبانی کے لیے روہت شیٹی سے رابطہ کیا ہے۔ میڈیا کے مطابق اب روہت شیٹی کے قریبی ذرائع نے ان خبروں کی تردید کردی ہے۔فلم میکر روہت شیٹی کے قریبی ذرائع کا کہنا ہے کہ بگ باس 16 کی میزبانی کے حوالے سے روہت شیٹی سے کوئی رابطہ نہیں کیا گیا لہٰذا یہ خبریں جھوٹی ہیں۔واضح رہے کہ اس سے قبل میڈیا نے دعویٰ کیا تھا کہ 13 سال سے بگ باس سے منسلک سلمان خان نے سیزن 16 کے لیے ایک ہزار کروڑ روپے کا مطالبہ کیا ہے۔روہت شیٹی میزبانی کے شعبے میں ایک منفرد مقام رکھنے کے باعث مشہور ہیں وہ آج کل رئیلٹی شو خطروں کے کھلاڑی سیزن 12 کی میزبانی کر رہے ہیں۔