مارویل کی بدترین ریٹنگ والی فلم کا سیکوئیل بنانے کی تیاری

لاس اینجلس،جولائی۔مارویل کی بد ترین فلم کا سیکوئیل بننے جا رہا ہے، یہ بات مارویل اسٹوڈیوز سے ہونے والی نیوز لیک کے ذریعے معلوم ہوئی ہے۔’ایٹرنلز’ کو مداحوں اور ناقدین کی طرف سے بالکل بھی پسند نہیں کیا گیا تھا لیکن اس کے باوجود فلم کا سیکوئیل بنانے کی تیاری ہو رہی ہے۔غیر ملکی جریدے کے مطابق مارویل اسٹوڈیوز کے تحت ایٹرنلز 2 کی پروڈکشن جاری ہے لیکن ابھی یہ نہیں معلوم کہ پروڈکشن میں کتنا وقت لگے گا۔ایٹرنلز کے پہلے پارٹ کی ہدایتکاری کلوئی زاؤ نے کی تھی لیکن دوسرے پارٹ میں ممکنہ طور پر وہ ہدایتکار نہیں ہوں گی۔واضح رہے کہ ایٹرنلز نومبر 2021 میں ریلیز ہوئی تھی لیکن وہ اب تک کی بد ترین ریٹنگ والی مارویل فلم رہی۔ریٹنگ ادارے آئی ایم ڈی بی پر ایٹرنلز کو 10 میں سے 6.2 ریٹنگ ملی جو کسی بھی مارویل فلم کی سب سے کم ریٹنگ تھی۔