پٹھان کے بائیکاٹ کا مطالبہ،کنگ خان کے مداح حمایت میں سامنے آگئے

ممبئی ،مارچ۔بولی وڈ کے سپرا سٹار شاہ رخ خان، جان ابراہم اور اسٹار اداکارہ دیپکا پاڈوکون کی نئی آنے والی فلم پٹھان کے سوشل میڈیا پر بائیکاٹ کا مطالبہ کیا جارہا ہے جس کے جواب میں کنگ خان کے مداح میدان میں آگئے۔ میڈیا رپورٹس کے مطابق نامور بھارتی ہدایت کار سدھارتھ آنند نئی آنے والی فلم کو ڈائریکٹ کررہے ہیں جو آئندہ سال 25 جنوری کو ریلیز کی جائے گی تاہم فلم سینما گھروں کی زینت بننے سے قبل ہی بائیکاٹ کے مطالبے کی زد میں آگئی لیکن اسٹارز کے پرستاروں نے فلم کا خوب دفاع کیا۔رپورٹ میں بتایا گیا کہ سماجی رابطے کی سائٹ ٹوئٹر پر بائیکاٹ پٹھان کا ٹرینڈ چلا تاہم یہ واضح نہیں ہوسکا کہ فلم کے بائیکاٹ کا مطالبہ کیوں کیا جارہا ہے۔شاہ رخ خان کے مداحوں نے ٹرینڈ کے دوران اداکار کی حمایت کی اور کہا کہ کوئی بھی پٹھان کو نہیں روک سکتا، بائیکاٹ کا مطالبہ بند کریں کیوں کہ یہ باکس آفس پر بلاک بسٹر فلم ثابت ہوگی۔ پرستاروں نے فلم کے پہلے دن40کروڑ کے بزنس کی پیش گوئی بھی کردی۔ کسی کا کہنا تھا کہ اس طرح کا ٹرینڈ دراصل فلم کی تشہیر کا ہی سبب بن رہا ہے۔خیال رہے کہ کنگ خان، جان ابراہم اور دیپکا کی فلم پٹھان اس وقت شوٹنگ اور تیاری کے مراحل سے گزر رہی ہے۔