سانپ کو بڑے پیار سے اٹھایا مگراس نے مجھے ہی ڈس لیا، سلمان خان

ممبئی،دسمبر۔بولی وڈ دبنگ ہیرو سلمان خان نے کہا ہے کہ انہوں نے بڑے پیار و چاہ سے سانپ کو ہاتھ میں اٹھایا مگر اس نے انہیں ہی ڈس لیا۔سلمان خان کو 25 دسمبر کو رات دیر گئے سانپ نے ان کے فارم ہاؤس پر کاٹا تھا۔اب انہوں نے سانپ کے کاٹنے کی تفصیلات میڈیا کو بتاتے ہوئے انکشاف کیا کہ انہوں نے ہی سانپ کو ڈسنے کی راہ بھی دکھائی۔شوبز ویب سائٹ پنک ولا کی جانب سے سلمان خان کی ویڈیو جاری کی گئی، جس میں وہ سانپ کے ڈسنے کی تفصیلات بتاتے دکھائی دیے۔اداکار نے بتایا کہ وہ اپنے رشتے داروں کے ساتھ ممبئی کے قریبی شہر پنویل میں موجود اپنے فارم ہاؤس گئے کہ وہاں ایک چھوٹا سانپ نظر آیا، جس سے بچے ڈر گئے مگر انہوں نے اسے اٹھایا۔سلمان خان نے بتایا کہ بچوں کے ڈرنے کے بعد انہوں نے پہلے ایک لکڑی سے سانپ کو اٹھایا تو وہ لکڑی چڑھتے چڑھتے ان کے ہاتھ پر آگیا۔بولی وڈ دبنگ ہیرو نے دعویٰ کیا کہ جب سانپ ان کے ہاتھوں تک پہنچا تو انہوں نے اسے بڑے پیار سے دوسرے ہاتھ میں اٹھایا اور اس وقت وہاں موجود لڑکوں نے شور مچایا تو سانپ کو معلوم ہوا کہ اسے کاٹنا بھی ہے۔سلمان خان کے مطابق وہاں موجود لڑکوں کے شور کے بعد ہی سانپ نے سمجھا کہ اسے کاٹنا بھی ہوتا ہے۔انہوں نے دعویٰ کیا کہ جب وہاں موجود لڑکوں نے دوبارہ شور کیا تو سانپ نے ایک بار پھر انہیں کاٹا، کیوں کہ سانپ کو سمجھ میں آگیا کہ اسے کاٹنا بھی ہوتا ہے۔مختصر ویڈیو میں سلمان خان نے بتایا کہ وہ چھوٹا مگر زہریلا سانپ تھا اور فارم ہاؤس جنگل میں ہے، جس وجہ سے وہاں سانپ آیا۔خیال رہے کہ سلمان خان کو 25 دسمبر کی شب رات تین بجے کے بعد سانپ نے کاٹا تھا، جس کے بعد انہیں ممبئی کے ایک نجی ہسپتال پہنچایا گیا تھا۔سلمان خان کو کچھ گھنٹوں تک ہسپتال میں رکھنے کے بعد انہیں گھر جانے کی چھٹی دے دی گئی تھی۔