جے شاہ مسلسل دوسری بار بلا مقابلہ آئی سی سی کے صدر منتخب، بورڈ نے اعتماد کا اظہار کیا
نئی دہلی، بین الاقوامی کرکٹ کونسل (آئی سی سی) نے جے شاہ کو مسلسل دوسری بار اپنا صدر مقرر کیا ہے۔ بالی میں منعقدہ آئی سی سی بورڈ کے

اجلاس کے دوران ڈائریکٹرز کی تجویز کے بعد جے شاہ کو بلا مقابلہ دوسری مدت کے لیے منتخب کیا گیا۔ اس فیصلے سے عالمی کرکٹ کی قیادت میں تسلسل برقرار رہے گا۔آئی سی سی بورڈ کا یہ فیصلہ جے شاہ کی قیادت پر اس کے اعتماد کی عکاسی کرتا ہے۔ کرکٹ کی عالمی سطح پر توسیع، شائقین کی تعداد میں اضافے اور تجارتی ترقی کے اعتبار سے یہ کھیل کے لیے ایک اہم دور ہے۔ کرکٹ لاس اینجلس اولمپکس 2028 میں واپسی کی تیاری کر رہا ہے۔ اس کے ساتھ ہی آئی سی سی نے مقابلوں کے طویل مدتی شیڈول میں توسیع کا بھی اعلان کیا ہے، جس سے مزید کھلاڑیوں کو شرکت اور ترقی کے مواقع حاصل ہو سکیں گے۔بورڈ نے کرکٹ کی بنیاد مضبوط کرنے، خواتین کی کرکٹ کی ترقی میں تعاون دینے، ایسوسی ایٹ اراکین کے لیے مواقع بڑھانے، بین الاقوامی کرکٹ کی ساکھ برقرار رکھنے اور کھیل کے طویل مدتی مستقبل کے لیے پائیدار تجارتی مواقع پیدا کرنے کے عزم کا بھی اعادہ کیا۔دوسری مدت کے لیے مقرر ہونے پر جے شاہ نے آئی سی سی کے حوالے سے کہا، ”آئی سی سی بورڈ نے مجھ پر جس اعتماد کا اظہار کیا ہے، اس سے میں خود کو انتہائی قابلِ فخر محسوس کر رہا ہوں۔ تمام ڈائریکٹرز کے مسلسل اعتماد اور تعاون کے لیے میں دل سے ان کا شکریہ ادا کرتا ہوں۔ آئی سی سی کے صدر کی حیثیت سے کام کرنا میرے لیے اعزاز کے ساتھ ساتھ ایک بڑی ذمہ داری بھی ہے۔ میں دنیا بھر میں کرکٹ کے مفادات کو آگے بڑھانے کے لیے اپنے اراکین کے ساتھ مل کر کام کرنے کے لیے پرعزم ہوں۔“
انہوں نے کہا، ”ہم اپنے کھیل کی تاریخ کے سب سے اہم اور دلچسپ دور میں داخل ہو رہے ہیں۔ لاس اینجلس اولمپکس 2028 میں کرکٹ کی واپسی ہمارے کھیل کو نئے شائقین تک پہنچانے اور کھلاڑیوں و مداحوں کی نئی نسل کو متاثر کرنے کا ایک غیر معمولی موقع ہے۔“جے شاہ نے کہا، ”ہماری ذمہ داری صرف کامیاب مقابلوں کے انعقاد تک محدود نہیں ہے۔ ہمیں شائقین، کھلاڑیوں، تجارتی شراکت داروں اور دیگر اہم متعلقہ فریقوں کو مدنظر رکھتے ہوئے کھیل کے لیے ایک زیادہ مضبوط اور پائیدار مستقبل تیار کرنا ہوگا۔ میرا ہمیشہ سے ماننا رہا ہے کہ لوگوں کو متحد کرنے کی صلاحیت ہی کرکٹ کی سب سے بڑی طاقت ہے۔ بورڈ اور اپنے اراکین کے تعاون سے ہماری توجہ اپنے عزائم کو عملی اقدامات میں تبدیل کرنے اور ایسی ترقی کو یقینی بنانے پر ہوگی، جس کا فائدہ آنے والی نسلوں کو بھی حاصل ہو۔“انگلینڈ اینڈ ویلز کرکٹ بورڈ کے چیئرمین رچرڈ تھامسن نے جے شاہ کی دوبارہ تقرری پر مبارک باد دیتے ہوئے کہا، ”جے کی قیادت ایسے وقت میں جاری رہے گی، جب بین الاقوامی کرکٹ ایک اہم دور سے گزر رہی ہے۔ کھیل تیزی سے تبدیل ہو رہا ہے۔ ایسے میں ضروری ہے کہ ہم بین الاقوامی شیڈول کو مضبوط بنائیں، دو طرفہ کرکٹ کی اہمیت اور مسابقت برقرار رکھیں اور بڑے مقابلوں کو کھیل کے مستقبل کا مرکزی حصہ بنائیں۔“انہوں نے کہا، ”آنے والے برسوں میں کرکٹ کی روایات اور جدت، نئے شائقین اور بدلتے ہوئے تجارتی منظرنامے سے پیدا ہونے والے مواقع کے درمیان توازن قائم کرنا اہم ہوگا۔ آئی سی سی کا کردار اراکین کو ایک ساتھ لانے، بین الاقوامی کرکٹ کے مستقبل کی سمت طے کرنے اور اسے پائیدار بنانے میں انتہائی اہم ہے۔ میں جے کو ان کی دوبارہ تقرری پر مبارک باد دیتا ہوں اور کھیل کے اس اہم اگلے مرحلے میں ان کے ساتھ اور دیگر اراکین کے ساتھ کام کرنے کا منتظر ہوں۔“آئی سی سی کی آزاد ڈائریکٹر ڈاکٹر راس ریواز نے کہا، ”میں جے کو آئی سی سی کے صدر کے طور پر دوبارہ مقرر ہونے پر مبارک باد دیتی ہوں۔ ان کی قیادت خواتین کی کرکٹ کی ترقی کو مزید مضبوط بنانے اور اسے آئی سی سی کے طویل مدتی وژن کا مرکزی حصہ برقرار رکھنے کا ایک اہم موقع فراہم کرتی ہے۔“انہوں نے کہا، ”دنیا بھر میں خواتین کی کرکٹ کو مسلسل فروغ مل رہا ہے، لیکن ہمیں ان کھلاڑیوں کے تئیں اپنی ذمہ داری کو بھی سمجھنا ہوگا، جن کے کھیلنے کے مواقع متاثر ہوئے ہیں۔ جے کی قیادت میں ہر خطے میں خواتین کرکٹرز کی حمایت کے لیے کی جانے والی کوششوں کو بھی تسلیم کیا جانا چاہیے۔ اس عزم کو آگے بڑھانا اور خواتین کے لیے کھیل سے وابستہ رہنے اور مقابلوں میں حصہ لینے کے نئے راستے تیار کرنا ضروری ہے۔“آئی سی سی کے نائب صدر اور زمبابوے کرکٹ کے چیئرمین توینگووا موکوہلانی نے کہا، ”جے نے مضبوط قائدانہ صلاحیتوں کا مظاہرہ کیا ہے اور کرکٹ کے مستقبل کے لیے مشترکہ وژن پر تمام اراکین کو متحد کرنے کے اپنے واضح عزم کا اظہار کیا ہے۔ ان کا نظریہ اس حقیقت کو تسلیم کرتا ہے کہ ہمارے کھیل کی طاقت تمام اراکین کے اجتماعی تعاون میں ہے۔ آئی سی سی کے فیصلے عالمی کرکٹ کے مفاد میں ہونے چاہئیں۔“
انہوں نے کہا، ”افریقہ کے ایک رکن کی حیثیت سے میں آنے والے مواقع کو لے کر خاص طور پر پ±رجوش ہوں۔ 2027 میں ہونے والا آئی سی سی مینز کرکٹ ورلڈ کپ اس براعظم میں کھیل کو نئے شائقین تک پہنچائے گا۔ یہ افریقی کرکٹ کے لیے ایک اہم موقع ہے، جو اس خطے میں کھیل کی ترقی پر طویل عرصے تک اثر انداز ہو سکتا ہے۔“نیوزی لینڈ کرکٹ کے ڈائریکٹر راجر ٹوز نے کہا، ”جے کی دوبارہ تقرری بین الاقوامی کرکٹ کے لیے ایک اہم وقت میں تسلسل اور قیادت فراہم کرے گی۔ کھیل کا مستقبل اس بات پر منحصر ہوگا کہ اراکین اجتماعی طور پر کتنا کام کرتے ہیں، بین الاقوامی کرکٹ کو کتنا مضبوط بناتے ہیں اور تمام فارمیٹس اور مارکیٹوں میں کھیل کی مقبولیت کو کس طرح برقرار رکھتے ہیں۔“انہوں نے کہا، ”نیوزی لینڈ ہمیشہ سے ایک مضبوط اور پائیدار بین الاقوامی کرکٹ نظام کی اہمیت کو سمجھتا رہا ہے۔ لاس اینجلس اولمپکس 2028 میں کرکٹ کی واپسی سمیت آنے والے بڑے مقابلوں کو مدنظر رکھتے ہوئے ہمیں کھیل کی عالمی ترقی کی رفتار کو آگے بڑھانا ہوگا اور ساتھ ہی ان روایات اور خصوصیات کو بھی محفوظ رکھنا ہوگا، جو کرکٹ کو منفرد بناتی ہیں۔“آئی سی سی ایسوسی ایٹ ممبر کے چیئرمین گرو مورتی پلانی نے کہا، ”کرکٹ کو حقیقی معنوں میں عالمی کھیل بنانے کے لیے ضروری ہے کہ ترقی کے ہر مرحلے پر اراکین کو بامعنی مواقع فراہم کیے جائیں۔ ایسوسی ایٹ اراکین کے لیے اس کا مطلب اعلیٰ سطح کے مقابلوں تک بہتر رسائی، ترقی کے مضبوط راستے اور پائیدار کرکٹ ڈھانچہ تیار کرنے کے لیے ضروری سرمایہ کاری ہے۔ میں جے شاہ کو ان کی نئی مدت کے لیے مبارک باد دیتا ہوں اور امید کرتا ہوں کہ ان کے اور بورڈ کے ساتھ مل کر کرکٹ کی عالمی توسیع کو تمام اراکین کے لیے حقیقی مواقع میں تبدیل کرنے کی سمت میں کام کریں گے۔“




