عوام کو خاموشی میں تکلیف جھیلنے کے لیے نہ چھوڑا جائے: سرتاج مدنی
سری نگر، پیپلز ڈیموکریٹک پارٹی (پی ڈی پی) کے سینئر لیڈر سرتاج مدنی نے کولگام کے آکھرن میں سی آر پی ایف کے تین اہلکاروں پر ہوئے حملے
کی مذمت کی ہے، تاہم ان کا کہنا ہے کہ اس کے بعد عائد کی گئی مبینہ پابندیاں خوف اور مشکلات کا ماحول پیدا کر رہی ہیں۔ انہوں نے اس معاملے پر منتخب حکومت کی ’’غیر معمولی خاموشی‘‘ پر بھی سوال اٹھایا۔مدنی نے کہا کہ یہ حملہ ’’انتہائی تشویشناک‘‘ ہے اور اس کی دو ٹوک مذمت ہونی چاہیے۔ ان کا کہنا تھا کہ تشدد کا کوئی جواز نہیں ہو سکتا اور ہر فرد کی سلامتی، چاہے وہ عام شہری ہو یا سیکورٹی اہلکار، سب سے مقدم رہنی چاہیے۔ انہوں نے کہا کہ تاہم اس واقعے کے بعد پیدا ہونے والی صورتحال بھی اتنی ہی باعث تشویش ہے۔ ان کے مطابق خاص طور پر آکھرن اور دیوسر حلقے کے ملحقہ علاقوں میں لوگوں کی نقل و حرکت پر عائد پابندیاں ’’خوف، بے یقینی اور اجتماعی مشکلات‘‘ کا باعث بن رہی ہیں۔ انہوں نے کہا کہ حالات رفتہ رفتہ نوے کی دہائی کی یاد دلا رہے ہیں۔ انہوں نے کہا: ’’ہم کشمیر کے لوگوں کو اس دور میں واپس دھکیلنے کی اجازت نہیں دے سکتے جس سے نکلنے کے لیے انہوں نے بے پناہ تکلیفیں اٹھائی ہیں۔‘‘مدنی نے کہا کہ سیکیورٹی کے امور پر کبھی سمجھوتہ نہیں ہونا چاہیے، لیکن اس کے نام پر عام شہریوں کے حقوق، وقار اور بنیادی آزادیوں کو بھی قربان نہیں کیا جا سکتا۔ ان کے مطابق سیکورٹی اقدامات خفیہ اطلاعات پر مبنی، متناسب اور شہریوں کی مشکلات کو مدنظر رکھنے والے ہونے چاہئیں۔ انہوں نے کہا: ’’قصورواروں کے کیے کی سزا بے گناہوں کو نہیں ملنی چاہیے۔‘‘
نیشنل کانفرنس کی قیادت والی حکومت کو نشانہ بناتے ہوئے پی ڈی پی لیڈر نے کہا کہ لوگوں نے ایک عوامی حکومت کو اس امید پر ووٹ دیا تھا کہ ان کی آواز سنی جائے گی، لیکن جن لوگوں نے عوام سے مینڈیٹ مانگا تھا، ان کی طرف سے تشویش کا ایک بامعنی بیان تک نہیں آیا۔ انہوں نے کہا: ’’عوام کی تکلیف پر خاموشی حکمرانی نہیں، ذمہ داری سے فرار ہے۔‘‘ انہوں نے پابندیوں پر فوری نظرثانی، متاثرہ باشندوں کے لیے راحت، شہری حقوق کے تحفظ اور حکومت کی طرف سے واضح عوامی ردعمل کا مطالبہ کیا۔ انہوں نے مزید کہا: ’’عوامی مینڈیٹ لوگوں کے ساتھ کھڑے ہونے کی ذمہ داری ہے، تکلیف میں مبتلا لوگوں کے سامنے چپ رہنے کا لائسنس نہیں۔‘‘11 نومبر کو کولگام کے میر بازار کے قریب نوپورہ آکھرن میں دہشت گردوں نے سی آر پی ایف کی ایک پارٹی پر ناکے پر فائرنگ کی تھی۔ فورس کی 46 ویں بٹالین کے تین اہلکار زخمی ہوئے تھے اور حملہ آور فرار ہو گئے تھے۔ سیکورٹی فورسز تب سے انہیں تلاش کرنے کے لیے بڑے پیمانے پر کارروائیاں کر رہی ہیں۔




