صدر جموہریہ دروپدی مرمو کے چھتیس گڑھ دورے کا پروگرام جاری

رائے پور۔ صدرجمہوریہ دروپدی مرمو آئندہ 22 اور 23 اکتوبر کو دو روزہ دورے پر چھتیس گڑھ میں رہیں گی۔ وہ بستر میں دسہرہ کے تحت منعقد ہونے والے پروگرام میں شرکت کریں گی۔ اس دوران وہ رائے پور اور جگدل پور میں مختلف تقریبات میں حصہ لیں گی۔وزیر اعلیٰ کے دفتر کے مطابق، 22 اکتوبر کو دوپہر 12:45 بجے رائے پور کے لوک بھون میں منعقدہ تقریب میں صدرجمہوریہ، پوجیہ ماتا ہاسی دیوی کے اعزاز میں 200 روپے کا یادگاری سکہ جاری کریں گی۔ شام 4 بجے رائے پور کے انڈور اسٹیڈیم میں نوآکھائی تہوار کے موقع پر منعقد ہونے والے ’سیوا سمان پرو‘ اور ’یووا پربودھن‘ پروگرام میں مہمان خصوصی کے طور پر شرکت کریں گی۔دوسرے دن، 23 اکتوبر کو صدر صبح 11 بجے جگدل پور کے ماں دنتیشوری مندر میں پوجا کریں گی۔ اس کے بعد دوپہر 12:45 بجے جگدل پور کے لال باغ میدان میں منعقد ہونے والے تاریخی اور روایتی ’مریا دربار‘ اور بستر دسہرہ کی تقریبات میں شرکت کریں گی۔ اس دوران وہ مانجھی چالکی، پجاریوں اور قبائلی برادری کے رہنماؤں سے براہ راست بات چیت بھی کریں گی۔قابل ذکر ہے کہ بستر دسہرہ دنیا بھر میں مشہور ہے اور اس کا اختتام ’مریا دربار‘ کے ساتھ ہوتا ہے، جسے قدیم قبائلی عوامی پارلیمنٹ بھی کہا جاتا ہے۔ وزیر اعلیٰ وشنو دیو سائے کی خصوصی دعوت پر صدر جمہوریہ اس تقریب میں شرکت کر رہی ہیں۔صدر جمہوریہ کے دورے کی تیاریوں کے سلسلے میں حال ہی میں چیف سکریٹری وکاس شیل نے ایک میٹنگ بلائی تھی۔ اس میٹنگ میں صدر کے دورے کے دوران پروگرام کے مقامات پر سکیورٹی انتظامات، نقل و حمل اور دیگر تمام ضروری سہولتوں کے معیارات کو یقینی بنانے کی ہدایات دی گئیں۔ صدر جمہوریہ کے اس پروگرام کے لیے محکمہ ثقافت کو نوڈل محکمہ مقرر کیا گیا ہے۔