ڈیپ فیک ویڈیو پر برہم ہوئے سلمان خان

ممبئی، ’بگ باس 20‘ کے حالیہ ’ویک اینڈ کا وار‘ ایپی سوڈ میں سلمان خان نے سوشل میڈیا پر بنائی جانے والی فرضی اے آئی اور ڈیپ فیک ویڈیوز پر سخت ناراضگی کا اظہار کیا۔اداکار نے بتایا کہ وہ خود بھی ایسی فرضی ویڈیوز کا شکار ہوچکے ہیں۔ انہوں نے کہا کہ کئی بار لوگ ان ویڈیوز کو اصلی سمجھ کر سوشل میڈیا پر شیئر کردیتے ہیں، جبکہ انہیں بنانے والے جان بوجھ کر گمراہ کن مواد تیار کرتے ہیں۔ سلمان نے ایسے لوگوں کے خلاف سخت قانونی کارروائی کا مطالبہ کیا۔
سلمان نے اے آئی ٹیکنالوجی کے غلط استعمال پر تشویش کا اظہار کرتے ہوئے کہا کہ کسی کی آواز کی نقل کرکے اسے قابل اعتراض انداز میں استعمال کرنا ایک سنگین معاملہ ہے۔ انہوں نے سوال اٹھایا کہ ایسی فرضی ویڈیوز بنانے اور پھیلانے والوں کے خلاف کارروائی کیوں نہیں ہونی چاہیے۔ اداکار نے کہا کہ جو لوگ جانتے ہیں کہ ویڈیو جعلی ہے اور اس کے باوجود اسے تیار کرکے نشر کرتے ہیں، ان کے خلاف سخت اقدامات کیے جانے چاہئیں۔ انہوں نے ایسے معاملات میں قصورواروں کو جیل بھیجنے کی بات بھی کہی۔
اداکار نے سوشل میڈیا پر فرضی اور گمراہ کن مواد پر قابو پانے کے لیے سخت قوانین کی ضرورت پر زور دیا۔ انہوں نے کہا کہ وہ اس مسئلے کو سنجیدگی سے اٹھائیں گے۔ انہوں نے یہ بھی کہا کہ ڈیپ فیک کا اثر صرف فنکاروں تک محدود نہیں ہے بلکہ عام لوگوں اور ان کے خاندانوں کو بھی اس کا نقصان اٹھانا پڑ سکتا ہے۔ ان کے بیان کے بعد سوشل میڈیا پر مداحوں نے بھی اے آئی اور ڈیپ فیک کے غلط استعمال کے خلاف ان کی تشویش کی حمایت کی۔