ٹرمپ نے آبنائے ہرمز کا نام بدل کر ’ٹرمپ اسٹریٹ‘ رکھنے کی خواہش ظاہر کی

واشنگٹن، مریکہ کے صدر ڈونلڈ ٹرمپ نے انتہائی اہم اسٹریٹیجک بحری گزرگاہ آبنائے ہرمز کا نام بدل کر ’ٹرمپ اسٹریٹ‘ یا آبنائے ٹرمپ رکھنے کی تجویز پیش کی ہے۔ ٹرمپ نے دعویٰ کیا کہ اس اہم بحری راستے پر اب امریکہ کا کنٹرول ہے۔ ان کا یہ بیان ایسے وقت میں سامنے آیا ہے جب ایران کے ساتھ امریکہ کا تقریباً چھ ماہ پرانا تنازعہ ہنوز جاری ہے اور خطے میں کشیدگی برقرار ہے۔ٹرمپ نے اپنے سوشل میڈیا پلیٹ فارم ’ٹروتھ سوشل‘ پر لکھا کہ جب یہ آبنائے ہرمز امریکہ کے کنٹرول میں ہے تو اس کا نام ’آبنائے ہرمز‘ سے بدل کر ’ٹرمپ اسٹریٹ‘ کیوں نہ رکھ دیا جائے۔ انہوں نے اسے امریکہ کی طرح زیادہ بااثر نام قرار دیتے ہوئے اپنی بات رکھی۔اس کے کچھ ہی دیر بعد وائٹ ہاؤس نے بھی سوشل میڈیا پر خلیج فارس کا ایک نقشہ شیئر کیا، جس میں آبنائے ہرمز کو ’ٹرمپ اسٹریٹ‘ کے نام سے نشان زد کیا گیا تھا۔ پوسٹ میں کہا گیا کہ اس نام کی اپنی ایک الگ کشش ہے۔ٹرمپ کی یہ تجویز جغرافیائی مقامات کے نام تبدیل کرنے کے حوالے سے ان کے حالیہ موقف کی کڑی کا حصہ ہے۔ اپنی دوسری مدتِ صدارت میں ٹرمپ نے کئی جغرافیائی نام تبدیل کرنے کی پہل کی ہے۔ ان میں خلیج میکسیکو کا نام بدل کر ’گلف آف امریکہ‘ کرنا اور شمالی امریکہ کی بلند ترین چوٹی ڈینالی کا نام دوبارہ ’ماؤنٹ میک کنلے‘ رکھنا شامل ہے۔ حال ہی میں انہوں نے کینیڈا کے ساتھ تجارتی کشیدگی کے درمیان جھیل اونٹاریو کا نام ’لیک امریکہ‘ رکھنے سے متعلق ایک حکم بھی جاری کیا تھا۔