کھڑگے اور راہل گاندھی کا وزیر اعظم مودی کو خط

کھڑگے اور راہل گاندھی کا چندے میں مبینہ خرد برد کے معاملے پر وزیر اعظم مودی کو خط

نئی دہلی، 19 جولائی کانگریس صدر اور راجیہ سبھا میں قائدِ حزبِ اختلاف ملکارجن کھڑگے، نیز لوک سبھا میں قائدِ حزبِ اختلاف راہل گاندھی نے رام جنم بھومی تیرتھ شیترا ٹرسٹ کے مالی معاملات میں چندے میں مبینہ خرد برد کے معاملے کی آزادانہ، غیر جانبدارانہ اور جامع تحقیقات کا مطالبہ کرتے ہوئے وزیر اعظم نریندر مودی کو مشترکہ خط لکھا ہے۔

کھڑگے اور راہل گاندھی نے اٹھارہ جولائی کو لکھے گئے اپنے مشترکہ خط میں کہا ہے کہ شری رام جنم بھومی تیرتھ شیترا ٹرسٹ کا قیام سپریم کورٹ کی ہدایت پر مرکزی حکومت نے کیا تھا اور اس کے بیشتر اراکین حکومت کی جانب سے نامزد کیے گئے ہیں، اس لیے مرکزی حکومت اس معاملے میں اپنی ذمہ داری سے پہلو تہی نہیں کر سکتی۔
خط میں کہا گیا ہے کہ ملک بھر کے کروڑوں عقیدت مندوں نے بھگوان شری رام کے مندر کی تعمیر اور اس کی خدمت کے لیے اپنی محنت کی کمائی عقیدت، بھکتی اور اعتماد کے ساتھ عطیہ کی تھی۔ ایسے میں ٹرسٹ کے مالی معاملات میں بے ضابطگیوں اور چندے میں مبینہ خرد برد کی خبروں نے عقیدت مندوں کے جذبات کو شدید ٹھیس پہنچائی ہے۔انہوں نے کہا کہ اس معاملے میں صرف داخلی جانچ کافی نہیں، بلکہ ایک آزاد، غیر جانبدار اور جامع تحقیقات کرائی جانی چاہیے تاکہ حقیقت سامنے آئے اور قصورواروں کو قانون کے مطابق سزا دی جا سکے۔کھڑگے نے اتوار کو سماجی رابطے کے پلیٹ فارم ایکس پر یہ خط شیئر کرتے ہوئے کہا، "وزیر اعظم مودی کو ہمارا مشترکہ خط، جس میں شری رام جنم بھومی تیرتھ شیترا ٹرسٹ کے مالی معاملات کی آزادانہ اور جامع تحقیقات کا مطالبہ کیا گیا ہے۔ اپنی محنت کی کمائی عقیدت، بھکتی اور اعتماد کے ساتھ عطیہ کرنے والے لاکھوں عقیدت مند اس مبینہ خرد برد کے بعد خود کو ٹھگا ہوا محسوس کر رہے ہیں۔”