غیر ملکی وفد نے سی بی آئی تحقیقات کی تعریف کی
نئی دہلی، اکتوبر۔آسٹریائی وفد نے سنٹرل بیورو آف انویسٹی گیشن (سی بی آئی) کے عہدیداروں سے ملاقات کی اور ہندوستانی ایجنسی کی طرف سے تیز رفتار تحقیقات کی تعریف کی جس کی وجہ سے آسٹریا اور دیگر پڑوسی ممالک میں دھوکہ دہی میں نمایاں کمی آئی ہے۔سی بی آئی نے یہاں ایک بیان میں یہ جانکاری دی۔ ان خیالات کا اظہار غیر ملکی وفد نے یہاں جاری 90ویں انٹرپول انٹرنیشنل جنرل اسمبلی (آئی جی اے) کانفرنس کے دوران کیا۔بیان میں کہا گیا ہے کہ دونوں ممالک کی ایجنسیاں جاری تحقیقات میں مزید تعاون کریں گی۔بیان میں کہا گیا ہے کہ "آسٹریائی وفد نے سی بی آئی کے حکام سے ملاقات کی اور ہندوستانی ایجنسی کی طرف سے کی جانے والی تیز رفتار تحقیقات کی تعریف کی۔‘‘بیان میں کہا گیا ہے کہ پولیس افسران کے درمیان بین الاقوامی تعاون کی مثال کے طور پر کچھ مغربی ممالک کے کچھ ان پٹ پر عمل کرتے ہوئے سی بی آئی نے ایک مقدمہ درج کیا اور حال ہی میں نئی دہلی کے شادی کھمپور گاؤں میں ایک کال سینٹر پر چھاپہ مارا۔ ملزمان نے قانون نافذ کرنے والے/یوروپول حکام کی نقل کرتے ہوئے غیر ملکی متاثرین کو بتایا کہ ان کی شناخت چرائی گئی ہے اور ان کے نام پر منشیات سے متعلق جرائم کا ارتکاب کیا گیا ہے۔سی بی آئی نے کہا کہ اس شک کو دور کرنے کے لیے متاثرین کو بینک ٹرانسفر، کرپٹو والیٹ، گفٹ کارڈ کوڈ یا واؤچر کوڈ کے ذریعے اپنے اثاثے/ رقم کو ٹرسٹ اکاؤنٹ میں منتقل کرنے پر مجبور کیا گیا۔ جانچ کے دوران سی بی آئی نے نوئیڈا میں ایک اور کال سینٹر کا پتہ لگایا اور اس پر چھاپہ مارا۔ آپریشن کے دوران 30,43,025 روپے کی رقم کے ساتھ 25.83 بٹ کوائنز (تقریباً) اور ملزمان کے مختلف والیٹ میں موجود 30,92,702 روپے جمع کرائے گئے ہیں۔سی بی آئی نے کہا کہ انٹرپول جنرل اسمبلی کے دوران ہندوستانی وفد نے کئی ممالک کے وفود کے ساتھ دو طرفہ ملاقاتیں کیں تاکہ پولیس تعاون سے متعلق معاملات پر تبادلہ خیال کیا جا سکے اور دوسری باتوں کے ساتھ ساتھ مجرمانہ انٹیلی جنس کے اشتراک کو بڑھایا جا سکے۔ ان ملاقاتوں کا مقصد سائبر کرائم اور بچوں کے آن لائن جنسی استحصال کے ساتھ ساتھ مفرو مجرموں کے جغرافیائی محل وقوع، دہشت گردی کا مقابلہ، دہشت گردی کی مالی معاونت اور آن لائن بنیاد پرستی سے نمٹنے کی کوششوں کو مربوط کرنا تھا۔اب تک برطانیہ، امریکہ، آسٹریلیا، متحدہ عرب امارات، بنگلہ دیش، نیپال، سری لنکا، آسٹریا، جنوبی افریقہ، نیوزی لینڈ، جاپان، بھوٹان، نمیبیا، بحرین، روس، کینیڈا، عمان، سربیا، ملائیشیا اور منگولیا کے ساتھ دو طرفہ ملاقاتیں ہو چکی ہیں۔یوروپول کے ساتھ پولیس تعاون کو مضبوط بنانے اور یوروپول کے ساتھ تعاون کے لیے ورکنگ ارینجمنٹ پر تبادلہ خیال کرنے کے لیے ایسی ہی ایک اور میٹنگ بھی منعقد کی گئی۔
