آسکر ایوارڈز، نامزد افراد کیلئے ایک لاکھ ڈالرز سے زائد مالیت بیگ کا تحفہ

لاس اینجلس ،مارچ۔آسکر ایوارڈز کے لیے نامزداب خالی ہاتھ بھی گھر نہیں جائیں گے۔دنیائے فلم کے اس سب سے بڑے ایوارڈز کی اہم ترین کیٹیگریز کے لیے نامزد 25 افراد کو ایک لاکھ ڈالرز سے زائد مالیت کا بیگ دیا جائے گا۔لاس اینجلس کی کمپنی ڈسٹینٹیو ایسٹس کی جانب سے ہر سال انعامات سے بھرا بیگ بہترین اداکار، اداکارہ، بہترین معاون اداکار اور اداکارہ اور بہترین ڈائریکٹر کے لیے نامزد ہونے والے افراد کو دیا جاتا ہے۔چنانچہ اس سال ول اسمتھ اور دیگر بڑے ناموں کو بھی گفٹ بیگ ملے گا جس کا خاص تحفہ اسکاٹ لینڈ میں ایک پلاٹ ہوگا جس کے ساتھ خطاب بھی دیا جائے گا۔اس پلاٹ کا رقبہ کتنا ہوگا یہ تو واضح نہیں کیا گیا مگر اس کے لیے ڈسٹینٹیو ایسٹس سے شراکت کرنے والی کمپنی ہائی لینڈ ٹائٹلز نے عندیہ دیا ہے کہ یہ پلاٹس ایک اسکوائر فٹ سے 100 اسکوائر فٹ کے درمیان ہوں گے۔ہر پلاٹ کے ساتھ زمیندار، لارڈیا لیڈی آف گلینکوچھوٹی وادی کی مالک یا مالکہ)کا خطاب بھی دیا جائے گا۔اس تحفے کے ساتھ اسکاٹ لینڈ کے Turin کیسل میں خصوصی قیام کا موقع بھی فراہم کیا جائے گا، جس کے ساتھ بٹلر سروس بھی دستیاب ہوگی۔خیال رہے کہ اس بیگ کو دینے والی کمپنی کا اکیڈمی آف موشن پکچرز اینڈ سائنسز سے کوئی تعلق نہیں اور اس کی جانب سے ہر سال اس طرح کے مہنگے تحائف دیئے جاتے ہیں۔آسکر ایوارڈز کی تقریب کا انعقاد 27 مارچ کو ہوگا۔