پنکج تریپاٹھی کا فلموں سے دور ہونے کا عندیہ

ممبئی،جنوری ویب سیریز سے شہرت کی بلندیوں پر پہنچنے والے بالی ووڈ اداکار پنکج تریپاٹھی نے کچھ عرصے کے لیے فلموں سے بریک لے لیا۔ تریپاٹھی کی 2020 میں 5 اور 2021 میں 6 فلمیں ریلیز ہوئیں تاہم اب انہوں نے فلموں سے بریک لینے کی خواہش کا اظہار کردیا۔ میڈیا سے بات چیت میں پنکج تریپاٹھی کا کہنا تھا کہ وہ پچھلے کچھ عرصے سے آٹو پائلٹ موڈ پر چل رہے تھے۔ انہوں نے کہا کہ دوسرے لوگوں کی طرح ہم بھی کورونا وائرس کی وبا سے نبرد آزما تھے اور اس دوران ہماری بھی جدوجہد ہے۔ اپنی بات کو جاری رکھتے ہوئے پنکج نے کہا کہ اس سال بھی میں پورے سال شوٹنگ کرتا رہا ہوں، تاہم اب اپنے کام کا وقت کم کرنے کا خواہشمند ہوں۔ انہوں نے کہا کہ مجھے احساس ہوا ہے کہ میں بہت زیادہ کام کر رہا ہوں، تو لہٰذا اس وقت جاری فلموں کے شوٹنگ ختم ہوتے ہی میں جلد ہی فلموں سے بریک لینے کی منصوبہ بندی کر رہا ہوں۔ ساتھ میں انہوں نے یہ بھی بتادیا کہ وہ اگلے سات ماہ کے لیے دستیاب نہیں ہیں جس کی وجہ ان کی فلموں کی شوٹنگ ہی ہے۔ واضح رہے کہ رواں برس پنکج تریپاٹھی کی میمی، کاغذ، بنٹی اور ببلی2 اور ممبئی ساگا جیسے بڑے پروجیکٹس ریلیز ہوئے۔