غریبوں کا لیڈر ہونے کی وجہ سے لاکو جیل بھیجا گیا : تیجسوی

پٹنہ ،فروری ۔مشہور چارہ گھوٹالہ کے ڈورنڈا ٹریژری سے غیر قانونی طریقے سے نکاسی کے معاملے میں راشٹریہ جنتادل ( آرجے ڈی) سپریمو لالو پرساد یادو کو پانچ سال کی سزا ملنے پر بہار اسمبلی میں اپوزیشن لیڈر اور ان کے چھوٹے بیٹے تیجسوی یادو نے مخالفین پر نشانہ لگاتے ہوئے کہاکہ غریبوں کا لیڈر ہونے کی وجہ سے انہیں ( آرجے ڈی سپریمو) کو جیل بھیجا گیا ۔ مسٹر یادو نے سموار کو یہاں کہاکہ ملک میں سب سے زیادہ غریب ہی جیل میں بند ہیں۔ غریبوں کا لیڈر ہونے کی وجہ سے ہی آرجے ڈی صدر کو جیل بھیجا گیا ۔ انہوں نے کہاکہ مرکزی جانچ بیو رو ( سی بی آئی ) کی خصوصی عدالت کوئی آخری عدالت نہیں ہے ۔ اس عدالت کے فیصلے کو ہائی کورٹ اور سپریم کورٹ میں چیلنج کیا جائے گا۔ اپوزیشن لیڈر نے وزیراعلیٰ نتیش کمار پر نشانہ سادھتے ہوئے کہاکہ ان کے ( مسٹر کمار ) کی مدت کار میں 80 گھوٹالے ہوئے ہیں لیکن ابھی تک کسی کو سزا نہیں ملی ہے ۔ انہوں نے کہاکہ بہار میں چارہ گھوٹالہ سے بھی بڑاسرجن گھوٹالہ ہے ۔ اس کی جانچ بھی نہیں ہورہی ہے ۔ انہوں نے کہاکہ کیگ رپورٹ میں دولاکھ روپے کی بے ضابطگی پائی گئی لیکن اس کی جانچ تک نہیں ہوئی ۔ انہوں نے کہاکہ یہ غلط روایت شروع ہوگئی ہے ۔ مسٹر یادو نے کہاکہ جانچ ایجنسیوں کا غلط استعمال ہورہاہے ۔ جو بھارتیہ جنتا پارٹی ( بی جے پی ) کے ساتھ مل جاتے ہیں ان پر کوئی کاروائی نہیں ہوتی ہے ۔ انہوں نے کہاکہ مہاراشٹر میں اجیت پوار بی جے پی کے ساتھ مل گئے تو راتوں ۔ رات ان پر سے تمام معاملوں کوواپس لے لیا گیا تھا لیکن جیسے ہی انہوں نے بی جے پی کو چھوڑا تو ان پر مرکزی جانچ ایجنسیوں کا چھاپہ پڑنا شروع ہوگیا۔