طوفان یونس کے سبب لندن میں طیاروں کو لینڈنگ میں مشکلات

لندن،فروری ۔ لندن کے ہیتھرو ہوائی اڈے پر لینڈنگ کی کوششوں کے دوران برطانیہ کے آسمان پر طیاروں کو مشکل صورت حال کا سامنا کرنا پڑا۔ طوفان کے باعث کئی طیاروں کو ڈولتے دیکھا گیا۔ دارالحکومت سمیت برطانیہ کے کئی دوسرے علاقوں میں جمعہ کو موسم کی خرابی کے پیش نظر ہائی الرٹ کر دیا گیا تھا، جب کہ طوفان یونس تیز ہواؤں کے ساتھ ملک سے ٹکرانے لگا تو اس سے نمٹنے کے لیے فوج کو بھی تیار کیا گیا تھا۔کچھ ویڈیوز میں دکھایا گیا ہے کہ ایک طیارہ لندن کے ہیتھرو ہوائی اڈے پر لینڈ کرنے سے قاصر ہے جبکہ دارالحکومت کے تمام ہوائی اڈوں پر بڑی تعداد میں پروازیں منسوخ کر دی گئی ہیں۔ خبروں کے مطابق میٹ آفس نے بتا یا کہ لاکھوں برطانویوں سے گھر پر رہنے کی اپیل کی گئی ہے اور جنوب مغربی انگلینڈ اور جنوبی ویلز میں بلند ترین سطح کا ریڈ الرٹ جاری کیا گیا۔میٹ آفس نے 2011 میں سسٹم متعارف کرائے جانے کے بعد پہلی بار لندن سمیت ملک کے جنوب مشرق میں صبح کے وقت دوسرا ہائی لیول الرٹ جاری کیا ہے۔وزیر مملکت برائے سلامتی ڈیمین ہندس نے برطانوی شہریوں سے غیر ضروری سفر سے گریز کرنے اور گھروں میں رہنے پر زور دیا۔ انہوں نے کہا کہ طوفان میں ہوا کی رفتار ساحلوں پر 145 کلومیٹر فی گھنٹہ اور اندرونی علاقوں میں 130 کلومیٹر فی گھنٹہ تک پہنچ سکتی ہے۔ اس قسم کے شدید موسم کے دوران زندگی کو خطرہ ہے۔ انہوں نے اسکائی نیوز پر کہا کہ فوج طوفان کا سامنا کرنے کے لیے تیار ہے، جو کہ گزشتہ تین دہائیوں میں سب سے بڑے طوفان میں سے ایک ہو سکتا ہے۔ برطانوی ماحولیاتی ایجنسی نے بھی بڑے سیلاب کے امکان سے خبردار کیا تھا، جب کہ ملک کے جنوب مغرب میں جمعے کے روز زیادہ تر اسکول بند کر دیے گئے تھے۔برٹش ایئرویز نے متعدد پروازیں منسوخ کر دیں اور ریل کمپنیوں نے اپنے مسافروں سے سفر نہ کرنے کا مطالبہ کیا اور خبردار کیا کہ آخری لمحات میں رکاوٹوں کا اعلان کیا جا سکتا ہے۔برطانیہ کے موٹر وے نیٹ ورک نے بھی حادثات کے زیادہ خطرے کی اطلاع دی۔ویلز میں بھی تمام بسیں اور ٹرینیں رک گئی ہیں۔ نجی آر ٹی ای نیٹ ورک کے مطابق ہمسایہ ملک آئرلینڈ میں جمعہ کی صبح 55,000 سے زیادہ گھروں کی بجلی منقطع کر دی گئی اور تمام اسکول دن بھر بند رہے۔