بھاجپا کو اقتدار سے دور رکھنے کی خاطر آنے والے انتخابات میں نوجوانوں کی شرکت ناگزیر: محبوبہ مفتی

سری نگر،نومبر۔جموں وکشمیر کے نوجوانوں کو انتخابی عمل میں بھر پور شرکت کرنے کا مشورہ دیتے ہوئے پی ڈی پی صدر محبوبہ مفتی نے کہاکہ آنے والے اسمبلی اور بلدیاتی انتخابات میں لوگوں کی شرکت ناگزیر ہے۔انہوں نے کہاکہ بھاجپا کو اقتدار سے دور رکھنے اور اپنے حقوق کی خاطر نوجوانو ں کو چناو میں بھر پور شرکت کرنی چاہئے۔ان باتوں کا اظہار محبوبہ مفتی نے سری نگر میں ایک ریلی سے خطاب کے دوران کیا۔ ٓانہوں نے کہاکہ جس ہندوستان میں ہم شامل ہوئے وہ جواہر لال نہرو کا ہندوستان ہے، وہ آنجہانی گاندھی جی، مولانا ابوالکلام آزاد اور راہل گاندھی کا ہندوستان ہے۔ انہوں نے کہاکہ راہول گاندھی اس وقت ہندو مسلم اتحاد کے لئے اس وقت بھارت جوڑو یاترا پر نکلے ہیں۔دفعہ 370کی منسوخی پر محبوبہ مفتی نے کہاکہ بھاجپا نے غیر قانونی اور غیر آئینی طریقے سے اس قانون کو منسوخ کیا۔محبوبہ مفتی نے کہا :’ ہم نے ہندوستان کے ساتھ ایک آئینی رشتہ قائم کیا تاہم بی جے پی نے عوامی توقعات کے برعکس جموں وکشمیر کو حاصل خصوصی اختیارات پر ڈاکہ ڈالا‘۔انہوں نے کہاکہ بی جے پی نے جموں وکشمیر کو تباہی کے دہانے پر پہنچایا اور اس طرح کی پالیسی نہ تو ماضی میں کامیاب ہوئی اور نہ ہی مستقبل میں یہ کامیاب ہو گی۔پی ڈی پی صدر نے نوجوانوں سے مخاطب ہوتے ہوئے کہاکہ بی جے پی کو الیکشن میں کسی بھی صورت میں موقع فراہم نہیں کیاجانا چاہئے۔انہوں نے کہاکہ اگر بلدیاتی ، پنچایتی اور اسمبلی انتخابات ہونگے تو نوجوانوں کو اس میں بھر پور شرکت کرنی چاہئے تاکہ بی جے پی کو دوسری دفعہ آسان جیت سے روکا جاسکے۔اُن کے مطابق بلدیاتی اور اسمبلی انتخابات نوجوانوں کی ایک طاقت ہے لہذا اس سے کسی کو آسانی کے ساتھ سپرد نہیں کیا جانا چاہئے۔محبوبہ مفتی نے مزید کہاکہ پنچایتی ، بلدیاتی اور اسمبلی چناو لوگوں کا ایک بڑا ہتھیار ہوتا ہے اور ہم یہ آسانی کے ساتھ کسی کو فراہم نہیں کریں گے لہذا آنے والے چناو میں نوجوانوں کی شرکت ناگزیر ہے تاکہ سازشی عناصر کے منصوبوں کو ناکام بنایاجاسکے۔سابق وزیر اعلیٰ نے مرکزی حکومت کو متنبہ کرتے ہوئے کہاکہ ہمارے ساتھ سوتیلی ماں کا سلوک روا رکھنے سے گریز کیا جانا چاہئے۔انہوں نے کہاکہ مرکزی حکومت نے جو کچھ ہم سے چھینا اُس کو ہم سود سمیت واپس لیں گے۔