نیتن یاہو جھوٹے ہیں، ان کے ہاتھ فلسطینی بچوں کے خون سے رنگے ہیں،

واشنگٹن، امریکی رکنِ کانگریس رو کھنہ نے اسرائیلی وزیراعظم بنیامین نیتن یاہو کو سخت تنقید کا نشانہ بناتے ہوئے کہا ہے کہ وہ جھوٹ بولتے ہیں اور ان کے ہاتھ فلسطینی بچوں کے خون سے رنگے ہوئے ہیں۔ انہوں نے مغربی کنارے میں اسرائیلی آبادکاروں کی مبینہ پرتشدد سرگرمیوں اور انہیں حاصل چھوٹ پر بھی تشویش ظاہر کی ہے۔

رو کھنہ نے یہ بیان واشنگٹن پوسٹ کی فوٹو جرنلسٹ ہائیڈی لیوائن پر مبینہ حملے کے بعد دیا۔ انہوں نے سوشل میڈیا پلیٹ فارم ایکس پر جاری دو الگ الگ پوسٹس میں واقعے کا ذکر کرتے ہوئے کہا کہ حملہ آوروں نے فوٹو جرنلسٹ کو اٹھا کر زمین پر پٹخ دیا اور اس کے بعد انہیں مسلسل ٹھوکریں ماریں۔امریکی رکنِ کانگریس نے مطالبہ کیا کہ اسرائیل کو دی جانے والی امریکی امداد پر نظرثانی کی جائے اور ایسی مالی و فوجی امداد بند کی جائے جو مغربی کنارے میں آبادکاروں کی سرگرمیوں کے لیے استعمال ہوتی ہے۔ انہوں نے اسرائیل کو ہتھیاروں کی فروخت روکنے کی بھی وکالت کی۔
رو کھنہ نے اپنے بیان میں جولائی میں پیش آنے والے ایک واقعے کا حوالہ بھی دیا۔ ان کے مطابق، وہ نیویارک ٹائمز کے ایک فوٹوگرافر کے ساتھ مغربی کنارے کے علاقے خربۃ زنوتہ میں موجود تھے، جہاں اسرائیلی آبادکاروں نے انہیں حراست میں رکھا تھا۔انہوں نے کہا کہ اس واقعے کے بعد اسرائیلی وزیراعظم بنیامین نیتن یاہو نے انہیں جھوٹا قرار دیا تھا۔ رو کھنہ کے تازہ بیان میں اسرائیلی حکومت کی پالیسیوں اور مغربی کنارے میں آبادکاروں کے طرزِ عمل پر ان کی تنقید ایک بار پھر سامنے آئی ہے۔رو کھنہ نے اپنے مؤقف کے ذریعے امریکی حکومت پر زور دیا ہے کہ وہ اسرائیل کو دی جانے والی امداد اور اسلحے کی فراہمی کے معاملے میں سخت موقف اختیار کرے، خصوصاً ایسے معاملات میں جہاں فلسطینیوں اور صحافیوں کے خلاف تشدد کے الزامات سامنے آتے ہیں۔