فوج نے پونچھ میں ایل او سی کے قریب بارودی سرنگوں کو تباہ کیا
جموں, جموں و کشمیر کے ضلع پونچھ میں لائن آف کنٹرول (ایل او سی) کے قریب فوج نے پانچ بارودی سرنگوں کا پتہ لگانے کے بعد انہیں ناکارہ بنا دیا۔حکام کے مطابق، ہفتہ کی صبح فوجی گشتی دستے نے بَسونی ٹاپ علاقے میں سرحدی باڑ کے قریب دو بارودی سرنگیں دیکھیں، جبکہ اسی علاقے میں جمعہ کے روز تین دیگر بارودی سرنگیں بھی برآمد ہوئی تھیں۔
حکام نے بتایا کہ فوج کے بم ناکارہ بنانے والے دستے نے کنٹرولڈ دھماکوں کے ذریعے تمام پانچ بارودی سرنگوں کو تباہ کر دیا۔ اس کارروائی کے دوران کسی قسم کا نقصان نہیں ہوا۔حکام کے مطابق، لائن آف کنٹرول کے اگلے علاقوں میں دراندازی کو روکنے کے لیے حفاظتی نظام کے تحت بارودی سرنگیں بچھائی گئی ہیں۔ تاہم، شدید بارشوں کے باعث بعض اوقات یہ سرنگیں اپنی جگہ سے کھسک کر زمین کی سطح پر آ جاتی ہیں، جس سے لوگوں کے لیے خطرہ پیدا ہو سکتا ہے۔
