کیٹ ونسلیٹ اپنی بیٹی کے ساتھ ڈرامہ سیریز آئی ایم میں نظر آئینگی

لاس اینجلس،اپریل۔آسکر ایوارڈ یافتہ معروف ہولی وڈ اداکارہ کیٹ ونسلیٹ اپنی بیٹی کے ساتھ ایوارڈ یافتہ ڈرامہ سیریز آئی ایم میں نظر آئیں گی۔بین الاقوامی ویب سائٹ کے مطابق معروف ہولی وڈ اداکارہ کیٹ وِنسلیٹ چینل 4 کی ایوارڈ یافتہ ڈرامہ سیریز آئی ایم کی پہلی قسط میں اداکاری کے جوہر دکھائیں گی۔آسکر ایوارڈ یافتہ اداکارہ اپنی بیٹی میا ٹھریپلیٹن کے ساتھ آئی ایم روتھ میں نظر آئیں گی جس کی شوٹنگ اپریل کے آخر میں شروع ہوگی، گزشتہ دو سیریز کی طرح، نئی سیریز کی تینوں اقساط مرکزی کرداروں کے نام پر ہوں گی۔سیریز کے تخلیق کار، مصنف اور ہدایت کار ایوارڈ یافتہ فلم ساز ڈومنک سیویج ہیں، سیریز کی ہر قسط کی کہانی مرکزی کرداروں کے تخلیقی اشتراک سے لکھی گئی ہے۔انفرادی فلموں کی یہ سیریز خواتین کے ان لمحات پر مشتمل ہے جو بے ساختہ جذبات، سوچ بچار اور ذاتی نوعیت پر مبنی ہوتے ہیں۔اس سیریز کا پہلا سیزن 2019 میں آیا تھا جس کی کاسٹ میں وکی مک کلور (آئی ایم نکولا)، گیما چین (آئی ایم ہیناہ) اور سمانتھا مورٹن (آئی ایم کرسٹی)، جو بافٹا ایوارڈ کیلئے نامزد ہوئیں تھیں، شامل تھیں۔دوسرے سیزن میں سورین جونز(آئی ایم وکٹوریا)، لیٹیٹا رائٹ (آئی ایم ڈینیئل) اور لیزلے مینولے (آئی ایم ماریہ) کاسٹ کی گئیں تھیں۔ڈومنک سیویج کا کہنا تھا کہ یہ ان کے لیے فخر کی بات ہے کہ وہ کیٹ ونسلیٹ کے ساتھ نئی سیریز کی پہلی فلم پر کام کر رہے ہیں۔