نوئیڈا میں ایک ہی خاندان کے پانچ افراد کی مشتبہ حالات میں موت

نوئیڈا، اتر پردیش کے ضلع گوتم بدھ نگر کے نوئیڈا میں تھانہ ربوپورہ علاقے کے نگلا شری پدم گاؤں میں ایک ہی خاندان کے پانچ افراد کی مشتبہ حالات میں موت ہوگئی۔ پولیس کو شبہ ہے کہ ان کی موت غذائی زہر خورانی (فوڈ پوائزننگ) کے باعث ہوئی ہے۔پولیس کمشنر کے میڈیا انچارج سُبودھ کمار نے بتایا کہ ہفتہ کی صبح تھانہ ربوپورہ پولیس کو اطلاع ملی کہ نگلا شری پدم گاؤں کے رہنے والے ایک ہی خاندان کے پانچ افراد مہیش (37) ولد کرشنا، للت (35) زوجہ مہیش، لڈو (11) ولد مہیش، مشٹی (7) دختر مہیش اور ساکشت (3) ولد مہیش اپنے گھر میں مردہ حالت میں پڑے ہیں۔ انہوں نے بتایا کہ واقعے کی اطلاع ملنے پر پولیس کے سینئر افسران، ایمبولینس اور فوڈ سیفٹی محکمہ کی ٹیم موقع پر پہنچی۔انہوں نے بتایا کہ فیلڈ یونٹ اور فارینسک ٹیم نے جائے وقوعہ کا معائنہ کیا۔ موقع سے سائنسی شواہد جمع کیے جا رہے ہیں۔ پانچوں افراد کی لاشوں کو قبضے میں لے کر پوسٹ مارٹم کے لیے بھیج دیا گیا ہے۔
میڈیا انچارج نے بتایا کہ ابتدائی طور پر معاملہ فوڈ پوائزننگ کا معلوم ہوتا ہے۔ آس پاس کے لوگوں نے پولیس کو بتایا ہے کہ متوفیوں نے رات میں نوڈلز کھائے تھے اور اس کے بعد صبح وہ مردہ حالت میں پائے گئے۔انہوں نے کہا کہ موت کی اصل وجہ کی ابھی تصدیق نہیں ہوئی ہے۔ پوسٹ مارٹم رپورٹ اور دیگر سائنسی تحقیقات کی بنیاد پر مزید قانونی کارروائی کی جائے گی۔اس واقعے کے بعد گریٹر نوئیڈا علاقے میں خوف و ہراس پھیل گیا ہے اور لوگوں میں طرح طرح کی چہ میگوئیاں ہو رہی ہیں۔ واقعے کی اطلاع ملنے پر جائے وقوعہ پر بڑی تعداد میں لوگ جمع ہوگئے۔