بالکل نہیں لگا کہ نکی اپنا پہلا میچ کھیل رہی ہیں: دیپتی

تاہم، اس کے بعد دیپتی شرما اور نکی پرساد کے درمیان 82 رن کی شراکت ہوئی اور میزبان ٹیم نے رائے پور میں پہلا ٹی 20 مقابلہ 4 وکٹوں سے جیت لیا، جبکہ 26 گیندیں باقی تھیں۔ تجربہ کار دیپتی نے 37 گیندوں پر 49 رن بنائے، جبکہ ہندوستان کی جانب سے پہلا میچ کھیلنے والی پرساد نے 35 گیندوں پر ناٹ آؤٹ 39 رن کی اننگز کھیلی۔
میچ کے بعد پریس کانفرنس میں دیپتی نے کہا کہ ”نکی نے بہت اچھی بلے بازی کی۔ سچ کہوں تو بالکل نہیں لگا کہ وہ اپنا پہلا میچ کھیل رہی ہیں۔ ایسا لگا کہ وہ اس سے پہلے بھی ملک کے لیے کئی میچ کھیل چکی ہیں۔”
دیپتی نے کہاکہ ”کسی نوجوان کھلاڑی میں اس طرح کا اعتماد دیکھنا شاندار ہے۔ جب ٹیم کو ضرورت ہو، اس وقت شراکت قائم کرنا اور مشکل حالات سے ٹیم کو جیت دلانا بہت بڑی بات ہے۔ مجھے یقین ہے کہ اس میچ سے ان کا اعتماد کافی بڑھے گا۔”
دیپتی نے کہا کہ اگرچہ شراکت کا آغاز مشکل حالات میں ہوا، لیکن ہندوستانی ڈریسنگ روم میں کسی طرح کی گھبراہٹ نہیں تھی۔ دیپتی نے کہاکہ ”سچ بتاؤں تو ہم دونوں کریز پر تھے اور رچا (گھوش) بھی ہمارے بعد بلے بازی کے لیے آنے والی تھیں۔ ایسا نہیں لگ رہا تھا کہ کچھ بھی ہو سکتا ہے۔ ہم نے اس وقت تھوڑا رک کر سوچا کہ آگے کیا کرنا ہے۔ یہ یقینی طور پر گھبرانے والی صورت حال نہیں تھی۔ اگر دباؤ نہیں ہوگا تو آپ ایک کھلاڑی اور ایک ٹیم کے طور پر مضبوط کیسے بنیں گے؟ وقتاً فوقتاً ایسے حالات کا سامنا کرنا ضروری ہے۔ اس کے بعد ہم نے ٹیم کو ایسی پوزیشن میں پہنچایا جہاں سے ہم میچ جیت سکتے تھے۔ ایک ٹیم کے طور پر ہم یہی کرنا چاہتے ہیں۔”
ہندوستان نے ابتدائی وکٹ زیادہ تر جارحانہ شاٹس کھیلنے کی کوشش میں گنوائیں۔ دیپتی نے ہندوستان کے جارحانہ انداز میں کھیلنے کے فیصلے کی حمایت کی۔ انہوں نے کہا کہ کبھی کبھی میچ میں ایسا بھی ہوتا ہے جب قسمت حریف ٹیم کا ساتھ دیتی ہے۔
دیپتی نے کہاکہ ”بلاشبہ ہم جارحانہ کرکٹ کھیلنا چاہتے ہیں اور ہمارے ذہن میں بھی یہی بات تھی۔ میچ میں کبھی کبھی ایسا ہو جاتا ہے۔ آپ کو ہر بار وہ نتیجہ نہیں ملتا جو آپ چاہتے ہیں۔ لیکن ہم اپنی ہر اننگز اور ہر میچ سے سیکھتے ہیں۔ مجھے یقین ہے کہ آج جو ہوا، وہ اگلے میچ میں نہیں ہوگا۔”
ہندوستان کو جیت کے لیے 14 رن کی ضرورت تھی، تبھی سویپ شاٹ کھیلنے کی کوشش میں گیند دیپتی کے بلے کا اوپری کنارہ لے کر ہوا میں چلی گئی اور وہ نصف سنچری سے ایک رن دور رہتے ہوئے آؤٹ ہو گئیں۔ انہوں نے کہاکہ ”اس وقت مجھے میچ ختم نہ کر پانے کا افسوس ہوا۔ میں نے سوچا تھا کہ شراکت قائم کروں گی، ٹیم کو ہدف کے قریب لے جاؤں گی اور پھر میچ ختم کروں گی، لیکن مجھ سے ایک چھوٹی سی غلطی ہو گئی۔ مجھے یقین ہے کہ میں اسے نہیں دہراؤں گی۔ بس یہی سوچ تھی کہ میچ کو جلد از جلد ختم کر دینا بہتر ہوتا۔”