سانبہ میں ڈینگی سے متاثرہ خاتون کی موت

جموں، ضلع سانبہ کے چک منگا علاقے میں ڈینگی سے ایک 35 سالہ خاتون کی موت کا معاملہ سامنے آیا ہے۔ متوفی کی شناخت جیوتی دیوی ساکن چک منگا، سانبہ کے طور پر ہوئی ہے۔ بتایا جاتا ہے کہ خاتون نے 11 اکتوبر کو ایمس میں علاج کے دوران دم توڑ دیا۔ تاہم محکمہ صحت نے اس موت کی اطلاع ملنے سے انکار کیا ہے۔
اطلاعات کے مطابق جیوتی دیوی کو 9 اکتوبر کو بخار کی شکایت پر ضلع اسپتال لے جایا گیا تھا، جہاں ڈینگی کی جانچ کے بعد بہتر علاج کے لیے ایمس ریفر کیا گیا۔ وہاں علاج کے دوران ان کی موت ہوگئی۔ اس واقعے کے بعد علاقے میں خوف و ہراس پھیل گیا ہے۔ مقامی لوگوں کا کہنا ہے کہ علاقے میں صحت کی جانچ کے لیے محکمہ صحت کی ٹیم نہیں پہنچی اور نہ ہی لوگوں کی صحت سے متعلق کوئی اقدامات کیے گئے ہیں۔
قابل ذکر ہے کہ اس سے قبل سانبہ کے کیہلی منڈی علاقے میں کلدیپ سنگھ کی ڈینگی سے موت ہوئی تھی۔ تازہ واقعے کے بعد ضلع میں ڈینگی سے دوسری موت کا دعویٰ کیا جا رہا ہے، تاہم محکمہ صحت نے اس کی تصدیق نہیں کی ہے۔ ڈسٹرکٹ ہیلتھ افسر ڈاکٹر انجو بالا کے مطابق سانبہ ضلع میں اب تک ڈینگی کے 163 معاملات سامنے آئے ہیں، جن میں زیادہ تر مریض صحت یاب ہوکر گھروں کو لوٹ چکے ہیں۔

انہوں نے بتایا کہ محکمہ صحت کی ٹیمیں مختلف علاقوں میں بیداری کیمپ منعقد کرنے، ادویات کا چھڑکاؤ کرنے اور لوگوں کی جانچ کرنے میں مصروف ہیں۔ محکمہ صحت نے لوگوں کو مشورہ دیا ہے کہ وہ گھروں اور آس پاس کے علاقوں میں پانی جمع نہ ہونے دیں، خصوصاً گملوں، کولروں اور خالی برتنوں میں پانی کھڑا نہ رہنے دیں۔ بخار کی صورت میں فوری طور پر قریبی اسپتال میں ڈینگی کی جانچ کرائیں۔