اکبر نگر کشن پور بائی پاس پر خوفناک سڑک حادثہ ، ٹرک اور تھار کی ٹکر میں دو کی موت

بھاگلپور، بھاگلپور-سلطان گنج مین روڈ پر اکبر نگر تھانہ علاقے میں کشن پور بائی پاس کے قریب اتوار کے روز ایک بے قابو ٹرک اور ایک تھار آپس میں ٹکرا گئی ۔ اس المناک حادثے میں تھار میں سوار دو افراد کی موقع پر ہی موت ہوگئی جب کہ گاڑی کو شدید نقصان پہنچا۔ ٹکر اس قدر شدید تھا کہ تھارکے ٹکڑے ٹکڑے ہو گئے اور زور دار آواز سن کر قریبی لوگ فوری طور پر جائے وقوعہ پر پہنچے۔ مقامی عینی شاہدین کے مطابق تھار سلطان گنج سے آرہی تھی جب کہ مخالف سمت سے تیز رفتار ٹرک آ رہا تھا۔ کشن پور بائی پاس موڑ کے قریب دونوں گاڑیاں آپس میں ٹکرا گئیں۔ حادثے کے بعد ٹرک ڈرائیور گاڑی چھوڑ کر موقع سے فرار ہونے میں کامیاب ہوگیا۔ گاؤں والوں نے فوراً مقامی اکبر نگر تھانہ کو اطلاع دی۔ اطلاع ملنے پر اکبر نگرتھانہ انچارج پولیس فورس کے ساتھ جائے وقوعہ پر پہنچے۔ تھار کی حالت اتنی خراب تھی کہ مرنے والوں کی لاشیں اندر ہی پھنس گئیں۔ مقامی لوگوں اور کرین کی مدد سے پولیس نے کافی کوشش کے بعد گاڑی کو کاٹ کر لاشوں کو باہر نکالا۔ پولیس نے دونوں لاشوں کو اپنی تحویل میں لے کر پوسٹ مارٹم کے لیے بھاگلپور کے جواہر لال نہرو میڈیکل کالج اسپتال (مایا گنج) بھیج دیا۔ پولیس فی الحال متوفی کی شناخت کرنے کی کوشش کر رہی ہے۔ اکبر نگر تھانہ انچارج نے بتایا کہ حادثہ میں ملوث دونوں گاڑیوں کو ضبط کرلیا گیا ہے۔ پولیس نے نامعلوم ٹرک ڈرائیور کے خلاف مقدمہ درج کر کے مزید قانونی کارروائی شروع کر دی ہے۔ تباہ شدہ گاڑیوں کو ہٹا کر بائی پاس روڈ پر ٹریفک بحال کر دی گئی ہے۔ پولیس فی الحال علاقے میں لگے سی سی ٹی وی کیمروں اور عینی شاہدین کے بیانات کی بنیاد پر واقعے کی اصل وجہ کی تحقیقات کر رہی ہے۔