میکا سنگھ کے سوئمبر میں نیت محل نے گلوکار کا دل جیت لیا

ممبئی ،جولائی۔بولی وڈ کے مشہور گلوکار میکا سنگھ ان دنوں اپنی دلہن کی تلاش میں مصروف ہیں۔اپنے جیون ساتھی کو تلاش کرنے کے لیے میکا سنگھ نے سوئمبر بھی رچایا ہے، جسے بھارتی ٹی وی چینل پر ٹیلی کاسٹ کیا جا رہا ہے۔ ملک کے کونے کونے سے لڑکیاں ان کے سوئمبر میں حصہ لینے آئی تھیں۔خاص بات یہ ہے کہ ہر کسی نے اپنے اپنے انداز میں میکا سنگھ کو متاثر کرنے کی کوشش کی اور انہیں اپنا دولہا بنانے کی بھی کوشش کی۔ اسی دوران میکا سنگھ کے بارے میں حال ہی میں چونکا دینے والی خبر آئی ہے کہ انہوں نے اپنی دلہن کا انتخاب کیا ہے اور وہ حسینہ چندی گڑھ کی رہائشی ہے۔میڈیا رپورٹس کے مطابق وہ حسینہ کوئی اور نہیں بلکہ نیت محل ہیں۔ بتایا جا رہا ہے کہ نیت محل نے ایک ٹاسک کے دوران میکا سنگھ کو اپنی کھانا پکانے کی مہارت سے متاثر کیا۔ انہوں نے میکا کے لیے کھیر بنائی جسے بولی وڈ گلوکار نے بھی بہت پسند کیا۔ اس کے علاوہ نیت محل نے کئی کاموں میں میکا سنگھ کا دل جیت لیا۔ ایسے میں خیال کیاجا رہا ہے کہ میکا سنگھ کی دلہن کوئی اور نہیں بلکہ نیت محل ہے۔یاد رہے کہ نیت محل نہ صرف پیشے سے ماڈل ہیں بلکہ ایک اچھی گلوکارہ بھی ہیں۔ لہٰذا انہیں یہ فائدہ بھی ہوا کہ وہ میکا سنگھ کو اچھی طرح جانتی تھیں۔ یہی نہیں، انہوں نے’سوئمبر: میکا دی ووہٹی ‘‘میں باقی لڑکیوں کو بھی سخت ٹکر دی۔حال ہی میں ’’سوئمبر: میکا دی ووہٹی‘ میں آکانکشا پوری کی انٹری ہوئی تھیں۔ ان کی شاندار انٹری سے باقی مقابلہ کرنے والے بھی حیران رہ گئے تھے۔