مدھیہ پردیش کی قبائلی آبادی میں گھر گھر جا کر راشن تقسیم کیا جائے گا: شیوراج

جبل پور، ستمبر-مدھیہ پردیش کے وزیر اعلی شیوراج سنگھ چوہان نے کہا کہ یکم نومبر سے قبائلی اکثریتی ترقیاتی بلاک میں آپ کے دروازے کے تحت گھر گھر راشن کی تقسیم کی جائے گی۔مسٹر چوہان نے یہ بات آج یہاں شہید راجہ شنکر شاہ اور رگھوناتھ شاہ کے یوم شہادت کے موقع پر منعقدہ پروگرام میں کہی۔ انہوں نے بتایا کہ ریاست کے 89 قبائلی اکثریتی ترقیاتی بلاک میں اب کسی بھی قبائلی بھائی بہن کو راشن لینے کے لیے دکانوں کے چکر نہیں لگانے پڑیں گے۔ حکومت ان کے حق کا راشن ان کے گھروں کو بھیجے گی۔مسٹر چوہان نے کہا کہ ہم گاؤں گاؤں تک راشن پہنچانے کے لیے ایک نئی اسکیم شروع کرنے جا رہے ہیں۔ اس کا فائدہ ہمارے قبائلی ترقیاتی بلاک کے 7 ہزار 500 سے زائد دیہات میں رہنے والے 23 لاکھ 80 ہزار خاندانوں کو دیا جائے گا۔ ان خاندانوں کو 489 گاڑیوں کے ذریعے راشن کا سامان پہنچایا جائے گا۔انہوں نے بتایا کہ ایک گاڑی کے ساتھ ہم ایک ماہ میں زیادہ سے زیادہ 20 دیہات میں راشن کی تقسیم کے انتظامات کر رہے ہیں۔ انہوں نے کہا کہ گاؤں میں ہی ہمارے قبائلی نوجوانوں کو روزگار فراہم کرنے کے لیے حکومت ان سے راشن گاڑیاں کرائے پر لے گی۔ ان گاڑیوں کو خریدنے کے لیے نوجوانوں کو بینک سے قرضے فراہم کیے جائیں گے۔مسٹر چوہان نے بتایا کہ ہمارے گاڑی کے مالک نوجوانوں کو ہر راشن گاڑی کے لیے ایک ماہ کے لیے 26 ہزار روپے کرایہ ملے گا تاکہ وہ اپنی روزی کما سکیں۔انہوں نے کہا کہ اٹل بہاری واجپئی سے لے کر نریندر مودی حکومت نے ان قبائلیوں کی فکر کی۔ انہوں نے بتایا کہ اٹل بہاری واجپئی حکومت نے ایک علیحدہ وزارت برائے قبائلی فلاح و بہبود ، ایک الگ قومی قبائلی کمیشن تشکیل دیا۔ اس کے ساتھ ہی مودی حکومت نے جنگلات کی مصنوعات کے لیے کم از کم امدادی قیمت ، ون بندھو کلیان یوجنا کے ذریعے ون دھن مرکز اور ٹرائی فوڈ پارک کی تعمیر ، اسٹینڈ اپ انڈیا اسکیم کے ذریعے قبائلی علاقوں میں کاروباری ترقی ، 10 لاکھ سے ایک کروڑ روپے کی امداد فراہم کی ہے۔