اگنیویروں کو سنٹرل پولیس فورس میں ترجیح دی جائے گی: شاہ

نئی دہلی، جون۔مرکزی وزیر داخلہ امت شاہ نے کہا ہے کہ اگنی پتھ یوجنا کے تحت تینوں خدمات میں چار سال مکمل کرنے والے اگنی ویروں کو سینٹرل پولیس فورس اور آسام رائفلز میں بھرتی کے معاملے میں ترجیح دی جائے گی۔ مسٹر شاہ نے بدھ کو ایک ٹویٹ میں اگنی پتھ یوجنا کو شروع کرنے پر وزیر اعظم نریندر مودی کو مبارکباد دیتے ہوئےکہا کہ یہ یوجنا ایک وژنری اور نوجوانوں کے مستقبل کو روشن بنانے کی سمت ایک قدم ہے۔ انہوں نے کہا کہ وزارت داخلہ نے چار سال مکمل ہونے پر سنٹرل پولیس فورس اور آسام رائفلز میں بھرتی کے معاملے میں اگنی ویر کو ترجیح دینے کا فیصلہ کیا ہے۔انہوں نے کہا ’’اگنی پتھ یوجنا‘‘ نوجوانوں کے روشن مستقبل کے لیے نریندر مودی جی کا ایک وژنری اور خوش آئند فیصلہ ہے۔ اسی تناظر میں آج وزارت داخلہ نے سینٹرل پولیس فورسز اور آسام رائفلز میں اس اسکیم کے تحت چار سال مکمل کرنے والے اگنی ویروں کو ترجیح دینے کا فیصلہ کیا ہے‘‘۔ایک دیگر ٹویٹ میں انہوں نے کہا ’’وزیر اعظم نریندر مودی کی رہنمائی میں وزارت داخلہ کے اس فیصلے کے ساتھ ’’اگنی پتھ یوجنا‘‘ سے تربیت یافتہ نوجوان ملک کی خدمت اور سلامتی میں مزید تعاون دے سکیں گے۔ اس فیصلے پر جامع منصوبہ بندی کا کام شروع ہوگیا ہے‘‘۔واضح رہے کہ منگل کو وزیر اعظم نریندر مودی کی صدارت میں مرکزی کابینہ کی سیکورٹی امور کی کمیٹی نے تینوں خدمات میں سپاہیوں کی بھرتی کے لیے اگنی پتھ کے نام سے ایک نئی اسکیم کے آغاز کو منظوری دی تھی۔

Advertisement

Related Articles