پولیس گھر میں گھس کر کسی کوبھی ماردےرہی ہے، کیا یہ طالبانی راج ہے

لکھنؤ؍مئی ۔ سدھارتھ نگر کے صدر تھانہ علاقہ کے کوڈراا گرانٹ گاؤں کے ٹولہ اسلام نگر میں ہفتہ کی رات دیر گئے ملزمان کو پکڑنے کے دوران گولی لگنے سے ایک خاتون کی موت ہوگئی۔ عام آدمی پارٹی کے رکن پارلیمنٹ سنجے سنگھ نے اس دردناک واقعہ پر شدید ردعمل کا اظہار کیا ہے۔ انہوں نے اپنی ٹویٹ میں لکھا ہے کہ بیٹی کی شادی سے پہلے ماں کا قتل۔ چندولی کا ایک اور واقعہ۔ آدتیہ ناتھ جی، آپ کے راج میں پولیس گھر میں گھس کر کسی کو بھی مار دیتی ہے۔ کیا یہ طالبانی راج ہے؟ چھاپے میں جانے سے پہلے تھانے میں پولیس والوں کے نام لکھے جاتے ہیں۔ پھر نامعلوم پولیس والوں پر مقدمہ کیوں؟سنجے سنگھ نے کہا کہ یوپی میں آدتیہ ناتھ کی پولیس کے ہاتھوں چندولی میں بیٹی کا قتل اور للت پور کے تھانے میں بیٹی کی عصمت دری جیسے واقعات حیران کن ہیں۔ مجرموں کو سزا نہیں مل رہی۔ بی جے پی کے دور حکومت میں دلتوں کی تذلیل روز کا واقعہ بن گیا ہے۔ میرٹھ میں دلتوں کو گھوڑے پر بیٹھنے کی اجازت نہیں، جلوس میں شامل خواتین کو بھی مارا پیٹا جاتا ہے۔ ظلم کی انتہا اس وقت ہوتی ہے جب مرزا پور کے اسپتال میں حاملہ خاتون سے زیادتی کا واقعہ منظر عام پر آتا ہے۔ یوپی میں کیا ہو رہا ہے؟ 04 کسان اور صحافی کو قتل کرنے والا ملزم مونچھوں پر تاو دیتا ہوا عدالت میں پیش ہوتا ہے ۔ انہوں نے کہا کہ یہ انتہائی شرم کی بات ہے کہ دنیا کی سب سے بڑی پارٹی غنڈوں اور بدمعاشوں کی دنیا کی سب سے بڑی پارٹی بن رہی ہے۔آپ کے رکن پارلیمنٹ سنجے سنگھ نے کہا ہے کہ آدتیہ ناتھ کی حکومت ریاست میں امن و امان کی صورتحال کو سنبھالنے میں ناکام ہے۔ ریاست میں بڑھتے جرائم اور قتل کے واقعات بتا رہے ہیں کہ ریاستی حکومت کے کنٹرول میں امن و امان نہیں ہے۔ یوپی میں آئے روز جرائم اور قتل سے اخبارات بھرے پڑے ہیں۔ انہوں نے کہا کہ عوام بہتر امن و امان چاہتے ہیں۔ پرامن اور خوشگوار زندگی گزارنا چاہتے ہیں، لوگ بہتر متبادل کی تلاش میں ہیں۔ انہوں نے کہا کہ اگر حکومت نے انتباہ نہیں کیا تو عام آدمی پارٹی حکومت کے خلاف آواز اٹھاتی رہے گی، چاہے اسے احتجاج کرنا پڑے یا بھوک ہڑتال کرنا پڑے، عام آدمی پارٹی کا ہر کارکن عوام کے ساتھ کھڑا ہونے کو تیار ہے۔