آسٹریلیا نے ہمیں دباؤ میں رکھا: ولیمسن

دبئی، نومبر۔نیوزی لینڈ کے کپتان کین ولیمسن نے آسٹریلیا کے خلاف ٹی 20 ورلڈ کپ کے فائنل میں شکست کے لیے اپنے گیند بازوں کو ذمہ دار نہیں ٹھہرایا ہے۔ انہوں نے کہا کہ اس پورے ٹورنامنٹ میں ان کے گیند بازوں نے شاندار گیند بازی کی ہے۔ ولیمسن نے میچ کے بعد کہا، ’’آسٹریلیا نے ہم سے بہت بہتر کرکٹ کھیلی اور ہمیں دباؤ میں رکھا۔ ہمیں وقفے وقفے سے وکٹیں نہیں ملیں، اس لیے آسٹریلیا پر دباؤ نہیں بن سکا۔ ” قابل ذکر ہے کہ نیوزی لینڈ کی گیندبازی یونٹ فائنل میچ میں 173 رنز کے ہدف کا دفاع نہ کر سکی۔ ٹرینٹ بولٹ کو چھوڑ کر، تمام گیند باز اپنی لائن اور لینتھ سے بھٹکے ہوئے نظر آئے۔ جس کے نتیجے میں گیندبازوں کی جم کر پٹائی ہوئی ۔ آسٹریلیائی بلے بازوں نے خاص طور پر ایش سوڈھی اور ٹم ساؤتھی کو اپنا نشانہ بنایا ۔نیوزی لینڈ پاور پلے کے دوران صرف 32 رنز ہی بنا سکی جو اس ٹورنامنٹ کے دوران اس کا سب سے کم پاور پلےا سکور ہے، حالانکہ کپتان ولیمسن نے خود ذمہ داری قبول کی اور 48 گیندوں پر شاندار 85 رنز بنا کر ٹیم کا سکور 172 تک پہنچا یا۔ نیوزی لینڈ کے کپتان نے کہا کہ دوسری اننگز کے حالات کو دیکھتے ہوئے اسے بہت بڑا اسکور نہیں کہا جا سکتا لیکن اس کے باوجود یہ ایک اچھا سکور تھا۔ ہم شاید ابتدائی وکٹیں حاصل کرکے دباؤ ڈال کر اس اسکور کا دفاع کر سکتے تھے لیکن شاید یہ ہمارا دن نہیں تھا۔ آسٹریلیا کی ٹیم بہت مضبوط ہے۔ انہوں نے پورے ورلڈ کپ میں بہترین کرکٹ کھیلی جسے انہوں نے فائنل میں بھی برقرار رکھا، حالانکہ اس پورے ٹورنامنٹ میں ہم نے جو کرکٹ کھیلی اس پر ہمیں فخر ہے۔ فائنل میں بھی ہم نے اچھی کرکٹ کھیلی، یقیناً یہ اتنا اچھا نہیں تھا کہ خطاب جیت سکیں۔